О́skemende qala kúni merekesine oraı shahar turǵyndary arasynda velo jarys uıymdastyryldy.
Qala ákimdigi men «Qazsınk» kompanııasy birlese uıymdastyrǵan saıystyń bir ereksheligi, qatysýshylardyń jasyna shekteý qoıylǵan joq. Olar úsh topqa (14 jastan asqan oqýshylar, stýdentter jáne eresekter) bólinip jarystyń kórigin qyzdyrdy. Shaıtan arba mingen shahar turǵyndary qalanyń negizgi kóshelerimen úsh aınalym jasap, ózderiniń sheberlikterin baıqap kórdi.
«Men qalada ótetin velo báıgelerdiń barlyǵyna qatysyp kelemin. Qazirgi ýaqytta О́skemende sport salasyna erekshe kóńil bólinip jatqany qýantady. Bul jarysqa oblys ortalyǵynan bólek Rıdder qalasynyń turǵyndary da qatysyp jatyr eken. Osyndaı sporttyq sharalardyń jıirek ótip turǵany jaqsy», - deıdi velobáıgege qatysýshylardyń biri Alekseı Ovchınnıkov.
Shara sońynda úzdik shyqqan oqýshylar men stýdentterge syılyq retinde uıaly telefondar men noýtbýkter, al eresekterge televızorlar tabys etildi.
Azamat QASYM,
«Egemen Qazaqstan»
О́SKEMEN