Astanada ótken halyqaralyq EKSPO-2017 kórmesi aıaqtalar tusta «Shymkent» ÁKK men «Rosatom Ortalyq Azııa» aımaqtyq ortalyǵy ózara yntymaqtastyq pen áriptestik kelisimine qol qoıdy. Onyń maqsaty - Ońtústik Qazaqstan oblysynda shaǵyn sý elektr stansııasy men basqa da balamaly energııa salasyn damytý, sondaı-aq, tabıǵat qoryn tıimdi paıdalaný men saqtaý bolyp tabylady. Qujatqa «Shymkent» ÁKK basqarma tóraǵasy Aıtmuhammed Aldajarov pen «Rosatom Ortalyq Azııa» bas dırektory Vıtalıı Dragýnov qol qoıdy.
Qos tarap Ońtústiktiń taýly aımaqtarynda qýattylyǵy 2MVt-qa deıingi, konteıner tıptes shaǵyn sý stansııalaryn salýdyń ınnovasııalyq pılottyq jobasyn birge qurmaq. Kelisilgen áriptestik boıynsha osy jyldyń qyrkúıek aıynyń ózinde mamandar stansııalardy salýǵa jáne sý jınaý qurylǵysy men konteınerlerdi ornatýǵa qolaıly oryndardy anyqtaý úshin alǵashqy tehnıkalyq is-saparmen keledi dep josparlanýda.
Konteınerdegi shaǵyn SES shyǵarýmen «Rosatom» memlekettik korporasııasynyń «Atomenergomash» kompanııasynyń quramyna kiretin Vengrııanyń Ganz Engineering and Energetics Machinery llc. (Ganz EEM) kompanııasy aınalysady. Shaǵyn SES-terdi turǵyndary elektr jelisine qosylmaǵan aımaqtarda qoldanýǵa bolady. Shaǵyn SES týrbınasy jáne basqarý tetigi bar konteınerler jetkizilgen soń bir aıdan keıin 1MVt-qa deıin elektr energııasyn óndire alady. Aıta keteıik, shaǵyn SES qashyqtyqtan, spýtnıkalyq baılanys arqyly basqarylady. Qazir shaǵyn SES-terdi ózge elderge eksporttaý boıynsha kelissózder júrgizilýde.
Ońtústik Qazaqstannyń taý, ózenderiniń mol áleýetin eskergen taraptar alǵashqy joba aıaqtalǵan soń da ári qaraı birge jumys istep, OQO ákimdiginiń qoldaýymen shaǵyn sý energetıkasy salasyndaǵy basqa da jobalardy júzege asyrýǵa nıetti.
«Shymkent» áleýmettik-kásipkerlik korporasııasy» ulttyq kompanııasy» AQ memlekettiń 100 paıyz qatysymen 2011 jyly qurylǵan. Kompanııa is-áreketiniń negizgi baǵyty - tıimdi memlekettik-jekemenshik áriptestik mehanızmi arqyly Ońtústik Qazaqstan oblysynyń áleýmettik-ekonomıkalyq damýy, oblystaǵy aktıvter men resýrstar áleýetin júzege asyrý, oblys, respýblıka, jaqyn jáne alys shetel naryǵyn barynsha júzege asyrýǵa negizdelgen.
Al «Rosatom Ortalyq Azııa» - «Rosatomnyń» Ortalyq Azııa aımaǵyndaǵy ókildigi. Keńse «Rosatomnyń» álemniń túrli elderindegi halyqaralyq jelisine jatady. Aımaqtyq ortalyqtardy «Rosatom halyqaralyq jelisi» (RMS) kompanııasy basqarady. RMS-tiń negizgi tapsyrmasy - memlekettik korporasııanyń shetel naryǵyndaǵy is-áreketin qoldaý, jańa bıznes-múmkindikterdi izdeý, Reseı atom salasynyń ónimderi men qyzmetin jahandyq naryqta usyný, tıimdi bıznes-alıans qurýda kómek kórsetý, «Rosatom» kásiporyndaryn marketıng jáne aqparattyq qoldaý bolyp tabylady.