Isataı aýdanyna qarasty Aqqystaý eldi mekeninde «Sazanquraq» atty jańa alleıa el ıgiligine paıdalanýǵa berildi. Elbasynyń «Bolashaqqa baǵdar: rýhanı jańǵyrý» maqalasy aıasyndaǵy «Týǵan jer» baǵyty boıynsha bıyl aýdanda osyndaı eki joba júzege asyrylady.
20 sharshy metr aýmaqty alyp jatqan alleıada aýdannyń ótken tarıhy men búgini týraly baıandaıtyn fotoshejire ekspozısııasy ornalasqan. Alleıanyń ashylý saltanatyna aýdan ákimi, aýdan aýmaǵynda ornalasqan jáne osy alleıany salýǵa atsalysqan munaı-gaz kásiporny "Sazanquraq" JShS basshylary, eńbek ardagerleri men aýyl turǵyndary qatysty.
Aldaǵy ýaqytta aýdanda «Týǵan jer» arnaıy jobasy boıynsha basqa da ıgi ister júzege asyrylady. Solardyń biri - tarıhı tulǵalarǵa eskertkish belgiler ornatý.
Joba aıasynda Aıbas qumynda ataqty kúıshi D.Nurpeıisovanyń kelin bolyp bosaǵa attaǵan jáne sanaly ǵumyryn ótkergen «Shápek» obasyna belgi ornatý josparlanǵan. Bul jumystar jergilikti kásipkerler men kásiporyndar, osy aýdannan shyqqan azamattardyń demeýshiligimen júzege asyrylatyn bolady. Týǵan ólke men elge degen qurmetti aıshyqtaǵan "Rýhanı jańǵyrýdyń" aıasynda atqarylyp jatqan jumystarǵa aýdan turǵyndary dán rıza.
Baqytgúl BABASh, «Egemen Qazaqstan»