Almatyda qaıta jańǵyrtýdan ótken Panfılov kóshesiniń boıynda dekoratıvti alma baǵy paıda bolady. Alleıa bıyl qazan aıynda otyrǵyzylmaq. Bul týraly joba avtory Roman Shnaıderman aıtty, dep habarlaıdy QazAqparat.
Onyń málimdeýinshe, bul jerge kóshetter emes uzyndyǵy 6-7 metrlik úlken aǵashtar kósheniń eki jaǵyn boılaı otyrǵyzylady.
«Sáýlet jobasynyń ıdeıasyna sáıkes alańda dekoratıvti alma aǵashtarynyń baǵy otyrǵyzylady. Alma aǵashtary alleıasy qala turǵyndarynyń jınalatyn súıikti ornyna aınalady dep senemiz. О́ıtkeni, aǵashtar gúldegen kezde bul jerde keremet kórinis bolady. Aıta ketý kerek, aǵashtar jemis bermeıdi», dedi Roman Shnaıderman.
Panfılov kóshesinde qazir oryndyqtar, túrli arhıtektýralyq pishinder qoıylǵan. Kóshe shamdary jańartylǵan. О́tken ǵasyrdyń 30 jyldary tóselgen eski kespe tastar da tarıhı mura retinde jolǵa tóselgen.
Panfılov kóshesiniń boıymen Qabanbaı batyr kóshesinen bastap Jibek jolyna deıingi aralyqta demalatyn oryndar, sport jáne balalar alańdary, abattandyrylǵan velojoldar paıda bolǵan. Sondaı-aq, jaıaý júrginshiler jolynda qurǵaq sýburqaqtar iske qosylǵan. Aryq júıeleri jańartylyp, barlyq ınjenerlik ınfraqurylym almastyryldy. Kóshe ashylǵaly beri bul jerde turǵyndar, qonaqtar demalystaryn ótkizip júr. Ala jazdaı júrgizilgen jumystardyń arqasynda qalanyń tarıhı ortalyǵynyń 1/3 bóligi qaıta jańǵyrtyldy.
Qala bıligi bul maqsatta 8 mlrd teńge jumsaǵan.