2013 jyldyń 22 qarashasynda Elbasy Nursultan Nazarbaevtyń Jarlyǵymen qyrkúıek aıynyń sońǵy jeksenbisi Eńbek kúni merekesi retinde belgilengen bolatyn.
Osy mereke qarsańynda О́skemende «Shyǵys Qazaqstan oblysy kásipodaqtar ortalyǵy» aýmaqtyq kásipodaqtar birlestiginiń uıymdastyrýymen «Kásipodaqtar eńbek adamynyń quqyn qorǵaý jolynda» atty oblystyq konferensııa ótti. Konferensııa aıasynda ótken seksııalarda óńirimizdegi kásiporyndarda óndiristik keńesterdi qurý, kelisim komıssııalarynyń jumysy men eńbek daýlaryn medıasııany qoldaný arqyly sheshý máseleleri jan-jaqty talqylandy. Oblystyń túkpir-túkpirinen kelgen kásipodaq ókilderi, zańgerler men advokattar ózara pikir almasyp, oılaryn ortaǵa saldy.
Búginde óndiristi óńir sanalatyn Shyǵys Qazaqstanda eńbekke qabiletti adamdardyń sany 700 myńnan asyp jyǵylady. Onyń 250 myńǵa jýyǵy oblystaǵy iri jáne orta kásiporyndarda jumys istese, sonyń 157 myńy kásipodaqtarǵa múshe kórinedi. Aımaqta áleýmettik jáne eńbek qatynastaryn retteý maqsatynda úsh jaqty komıssııa jumys isteıdi.
«Bul komıssııanyń jumysy óziniń tıimdiligin kórsetip otyr. Máselen, óńirdegi óndiris ornynyń birinde 200 qyzmetkerge qysqarý qaýpi tóngende úsh jaqty komıssııa kómekke kelip, qaladaǵy 24 kásiporynnyń qatysýymen eńbek jármeńkesin uıymdastyryp, nátıjesinde barlyq jumysshylar eki qolǵa bir kúrek tapty. 2015 jyly oblysta jalaqy boıynsha qaryz 1 mıllıard teńgege jetkenimen, áleýmettik seriktestik arqyly qaryzdyń bárin qaıtarýǵa qol jetkizildi», - dedi «Shyǵys Qazaqstan oblysy kásipodaqtar ortalyǵy» aýmaqtyq kásipodaqtar birlestiginiń tóraıymy Aıjan Sadyqova konferensııada sóılegen sózinde.
Birlestik tóraıymy sonymen qatar Shyǵys Qazaqstan oblysy ujymdyq kelisimsharttarǵa otyrý boıynsha respýblıkada alǵashqy bestikke enip otyrǵanyn, aldaǵy bir aı kóleminde óńirde jumyskerlerdiń quqyǵyn qorǵaýdyń tıimdiligin arttyrý úshin arnaıy metodıkalyq kabınet ashylatynyn, bul kabınet kásipodaqtyń barlyq múshelerine qoljetimdi bolatynyn jetkizdi. Merekelik shara sońynda Aıjan Sadyqova jınalǵandardy Eńbek kúni meıramymen quttyqtap, birneshe adamǵa Qazaqstan kásipodaqtary federasııasynyń belgisi men Qurmet gramotalaryn saltanatty túrde tabys etti.
Azamat QASYM,
«Egemen Qazaqstan»
О́SKEMEN
Sýretti túsirgen - avtor