Aqtóbe qalasynda taǵy bir qanatqaqty joba turǵyndardyń ıgiligine qyzmet ete bastady. Bul – «Halyqtyq keńse» ataýyn ıelengen halyqqa qyzmet kórsetý ortalyǵy.
Onyń ózi tektes áleýmettik mekemelerden ózgesheligi – azamattarǵa memlekettik qyzmetti sapaly ári qoljetimdi, qolaıly túrde kórsetýdi maqsat tutýy. Mundaǵy jumys «bir tereze» qaǵıdatyna negizdelgen.Biregeı joba «100 naqty qadam» Ult jospary aıasynda ómirge jol tartty.
Buǵan tán basymdyqtar ashyqtyq pen jarııalylyqqa arqa súıeý, sybaılas jemqorlyqtyń aldyn alý jáne qoljetimdilik pen yńǵaılylyqty birinshi kezekke qoıý bolyp otyr.
«Halyqtyq keńsede» turǵyndar memlekettik qyzmetti paıdalaný úshin túrli satylardan ótip áýre-sarsańǵa túspeıdi. О́tinishterin berse jetkilikti. Qalǵan istiń bári óz jónimen retin taýyp júre beredi. О́ıtkeni mundaǵy mamandar halyqtyń talap-tilekterin kóp keshikpeı tıisti memlekettik organdarǵa joldaıdy. Qanatqaqty jobanyń «Halyqtyq keńse» ataýynyń bir tórkini osyndaı bolyp shyqty. Buǵan deıingi quqyqtyq qyzmetter ortalyǵy da aldaǵy kezde «Halyqtyq keńsemen» qoıan-qoltyq jumys jasamaq.
Qyzmetter tizbesin neǵurlym sapaly ári jan-jaqty kórsetý úshin jańa áleýmettik qurylymǵa 20 uıymnyń keńesshileri men mamandaryn qatystyrý kózdelgen. Munda qyzmettiń 600-den astam túri kórsetilmek. Atap aıtqanda, qyzmettiń eń negizgilerin jer qatynastary, turǵyn úı-kommýnaldyq sharýashylyǵy, kólik jáne kommýnıkasııa, aýyl sharýashylyǵy, bilim, kásipkerlikpen shuǵyldaný jáne qurylys pen týrızm salalary quraıdy.
Tusaýy kesilgenine sanaýly kúnder bola tursa da «Halyqtyq keńseniń» qyzmetine degen suranystar birden ósip sala berdi. Bul sózimizge alǵashqy kúnniń ózinde ortalyqqa myńdaǵan adamdardyń kelgeni aıqyn aıǵaq.
Temir QUSAIYN,
«Egemen Qazaqstan»
AQTО́BE