Úsh aı boıy Astana qalasynda uıymdastyrylǵan EKSPO-2017 halyqaralyq mamandandyrylǵan kórmesinde «Kazakh Invest» ulttyq kompanııasy kóptegen kezdesýler ótkizdi, 22 kelisimshart pen memorandýmǵa qol qoıyldy.
Qujattardyń biri ıtalııalyq «Bıonet» kompanııasymen birlesip, turmys qaldyqtaryn óńdeıtin zaýyt salýǵa arnalǵan. Jobanyń quny – shamamen 100 mln dollar. Bul derekterdi Úkimet úıinde ótken baspasóz máslıhatynda «Kazakh Invest» UK» AQ basqarma tóraǵasynyń orynbasary Birjan Kaneshev aıtty.
«Bıyl EKSPO-2017 kórmesiniń uıymdastyrylýy bizge taptyrmas múmkindik alańy boldy. Ony iske asyrý úshin arnaıy pavılon turǵyzyldy, onda Investısııalar jáne damý mınıstrligi men Astana qalasy ákimdiginiń ókilderi árekettegi jáne áleýetti sheteldik ınvestorlarmen kezdesýler ótkizdi. Onymen qosa, «Kazakh Invest» pavılonynyń bazasynda áleýetti ınvestorlardyń Astana halyqaralyq qarjy ortalyǵy, «Astana Innovations», «Nazarbaev ýnıversıteti» jáne ulttyq kompanııalar ókilderimen kezdesýleri uıymdastyryldy.
Kórme barysynda 150-den astam jıyn ótkizdik. «Kazakh Invest» kompanııasy múmkindikti barynsha paıdalandy. Sharaǵa qatysqan elderdiń ókilderimen kezdesip, elimizdiń ınvestısııa salasyna qandaı qoldaý kórsetilip jatqanyn túsindirdik. Sonymen qatar basqa pavılondarda ótken bıznes konferensııalarǵa, basqosýlarǵa qatysyp, qosymsha 100-den astam jıynǵa atsalystyq. Nátıjesinde 22 qujat rásimdeldi», dedi ol. Birjan Bısekenulynyń aıtýynsha, budan bólek AQSh, Nıderlandy, Shveısarııa, Monako, Túrkııa, Qytaı sııaqty Qazaqstannyń qazirgi iri ınvestorlarymen kelissózder júrgizilip, ózara yntymaqtastyq baǵyttary aıqyndalǵan. Investorlar tarapynan biraz usynystar aıtylsa, onyń barlyǵy pysyqtalý ústinde.
Birjan Kaneshev qol jetkizilgen ýaǵdalastyqtar aıasyndaǵy mańyzdy jobalarǵa toqtaldy. «Salmaǵy basym 4 jobany atap ótkim keledi. Sebebi, olardy iske qosýǵa múmkindik bar. Mysaly, «Gendıgrýpp» kompanııasy Temirtaý qalasyndaǵy sýtegi óndirisi boıynsha zaýytqa ınvestısııa saldy. Jobanyń quny naqty anyqtalmaǵan. Shamamen 150 mln dollardy quraıdy. Sonymen qatar Italııanyń «Bıonet» kompanııasy turmys qaldyqtaryn óńdeıtin zaýyt salýdy usyndy. Bul – óte mańyzdy joba», degen basqarma tóraǵasynyń orynbasary aldaǵy ýaqytta Polshanyń «Polpharma» kompanııasy otandyq farmasevtıka kompanııasyna qarjy salýdy josparlap otyrǵanyn jetkizdi. 1935 jyly irge qalaǵan bul uıym qazirgi tańda Ortalyq jáne Shyǵys Eýropa, Kavkaz, Ortalyq Azııa naryqtarynda kósh bastap tur.
«Polpharma» elimizdegi dári-dármek salasyna reınvestısııa jasamaq nıette. Bul salany da bizge damytý qajet. О́ıtkeni, qazirgi tańda qazaqstandyq farmasııa salasynda halyqaralyq deńgeıde akkredıtasııadan ótken ǵylymı-zertteý laboratorııasy joq. Sondaı-aq, biz «Ingave Kazakhstan» kompanııasymen de baılanys ornata beremiz. Sońǵysy Astana qalasyndaǵy «smart» jobalarǵa qatysty. Jalpy, kelisimsharttar aıasynda munaı jáne hımııa, farmasevtıka, IT-tehnologııa, mashına qurastyrý salalaryna basymdyq beriledi», dedi «Kazakh Invest» ulttyq kompanııasynyń ókili. Onyń málimetinshe, ulttyq kompanııa men «Engave Kazakhstan» arasynda ózara túsinistik týraly memorandým jasalǵan. Kelisim aıasynda «Astana qoǵamdyq kólikteri jolaýshylaryn aqparattandyrýdyń mýltımedııalyq júıesi» ınvestısııalyq jobasy jetildiriledi.
Ashat RAIQUL,
«Egemen Qazaqstan»