Astana qalasynda ótken EKSPO-2017 halyqaralyq kórmesi aıaqtalǵannan keıin de Elbasynyń atyna jan-jaqtan quttyqtaý hattar kelip túsýde, dep habarlady Prezıdenttiń baspasóz qyzmeti.
Sondaı hattyń birin Japonııanyń Aıchı prefektýrasynyń turǵyny, «EKSPO-áje» atanǵan Tomııo Iаmada joldaǵan.
Hat ıesi: «Men 2005 jyly Aıchı-EKSPO kórmesinde alǵash ret Qazaqstan pavılonyn aralap kórip, Sizdiń elińiz jaıly kóp nársege qanyqtym. Sodan beri Qazaqstanǵa kelýdi armandadym. 2008 jyly Ispanııanyń Saragosa qalasynda ótken EKSPO kórmesinde de sizderdiń ulttyq pavılondaryńyzda boldym», dep jazǵan.
Tomııo Iаmada bıyl EKSPO-2017 kórmesiniń elshisi atanǵanyn, Qazaqstanǵa kelip, kópten kútken armany oryndalǵanyn baıandaǵan.
Osy oraıda ol: «Kórmege eki ret bardym. Qazaqstannyń ulttyq mýzeıi men qaladaǵy ortalyq saıabaqty, Tuńǵysh Prezıdent mýzeıin aralap kórdim. Sizdiń óz elińizge degen qamqorlyǵyńyzdy sezine aldym», dep atap ótken.
Avtor Astanadan jáne EKSPO-2017 kórmesinen jaqsy áser alǵanyn aıtyp, ǵylymı jańalyqtardyń adamzattyń jarqyn bolashaǵy úshin paıdalanylatynyna senim bildirgen.
Hat sońynda Tomııo Iаmada Nursultan Nazarbaevqa kórmeniń joǵary deńgeıde uıymdastyrylǵany úshin alǵys aıtqan.