Qazaq ómirdiń ólshemin «qamshynyń sabyndaı» dep qysqa qaıyrǵan. О́zi jalǵan, ózi qysqa ómirde ǵıbratty ǵumyr súrý árkimniń mańdaıyna buıyra bermes baq. «Jaqsynyń aty ólmeıdi, ǵalymnyń haty ólmeıdi» degen Jırensheniń jıi aıtatyn sózi ómirin ónegemen órnektegen tulǵalarǵa qatysty bolsa kerek. Solardyń qatarynda tirshiligin tilshilikpen ushtastyrǵan, janyna jazýdy, qolyna qalamdy serik etken júırik jýrnalıster de bar. О́mirden ózi ketse de, sózi qalǵan qalamgerlerdiń qadiri qashanda bıik. Olardy eske alyp, estelikpen bólisip, sharapatty sharalar uıymdastyrý artyndaǵy izdeýshileriniń izgilikti isine aınaldy desek artyq aıtqandyq bolmas. Biz sonyń kýágeri de boldyq.
«Olardyń esimderi bizdiń júregimizde» degen ataýmen ótken keshtiń mazmuny tereń, mańyzy joǵary deýge bolady. Ulaǵatty sharany uıymdastyryp, uıytqy bolǵan Astana qalasy ákimdiginiń tuńǵysh baspasóz hatshysy, Qazaqstan Respýblıkasynyń eńbek sińirgen qaıratkeri, «Túgel medıa» birlestiginiń basshysy Sádibek Túgeldiń sózine súıensek atalǵan shara osydan 5 jyl buryn uıymdastyryla bastaǵan eken.
«Iá, 2012 jyldyń 4 mamyry kúni osyndaı ıgi sharanyń tusaýy kesildi. Biz bul kúni «Astana qalasy halyqaralyq baspasóz ortalyǵynyń» jumysyna belsene aralasqan, 14 ataqty qalamger-jýrnalısti, daryndy áriptesterimizdi eske aldyq. Olardyń ishinde Aqseleý Seıdimbek, Dúkesh Baıymbetov, Vladımır Kochenov, Talǵat Ilimjan, Rafael Jumabaev, Jumataı Sabyrjanov, Oktıabr Álibekov, Jomart Ábdihalyq, Vladımır Boıko, Madrıd Rysbekov, Shákızada Quttaıaqov, Almas Joltaev, Oleg Kvıatovskıı, Birjan Belǵara bar. Al ekinshi eske alý keshi 2013 jyldyń 12 jeltoqsany kúni «Jastar» saraıynda joǵary deńgeıde ótkizildi. Onda elordamyzdyń damýyna jáne jýrnalıstıkaǵa zor úles qosqan áriptesterimiz Ásken Nábıev, Baqtybaı Shahanov, Vladımır Gýndarev, Erbol Shaımerdenov, Dúkenbaı Dosjan, Sabyrjan Shúkirov, Marfýǵa Bektemirova, Andreı Trıshechkın, Natalıa Habarova, Ivan Balýchevskıı týraly beıne-sıýjetter kórsetilip, áserli estelikter aıtyldy. Úlken tebirenispen ótken sharada kózine jas alyp, kóńili tolqymaǵan jan bolmady», dedi Sádibek Túgel.
Osymen úshinshi márte uıymdastyrylyp otyrǵan keshte «Tumar» jýrnalynyń negizin qalaýshy, onyń bas redaktory, poezııa padıshasy Farıza Ońǵarsynova, «Jańa Saryarqa» jýrnalynyń negizin qalaýshy, bas redaktory, aqyn Nurǵoja Oraz, «Álem ádebıeti» jýrnalynyń negizin qalaýshy, bas redaktory, jazýshy Keńes Iýsýp, «Astana aqshamy» gazetiniń bas redaktorynyń orynbasary, jazýshy Dıdahmet Áshimhanuly, «Ekspress-K» gazetiniń bas dırektory Alekseı Pan, «Egemen Qazaqstan» gazetiniń jaýapty qyzmetkeri Marat Aqqul, Qazaqstan Respýblıkasy Prezıdenti teleradıo kesheniniń redaktory Smaǵul Rahymbek, «Astana jas tilshiler kózimen» festıvaliniń avtory ári uıymdastyrýshysy Svetlana Galıeva, Eýrazııa ulttyq ýnıversıteti jýrnalıstıka fakýltetiniń ustazy Sembaı Qısymuly, «Azamat Taıms» gazetiniń bas redaktory Erlan Aqmýrzın, «Astana radıosynyń» qyzmetkeri Álııa Júsipova, «Habar» telearnasynyń tilshileri Olga Latynına, Azamat Qalymbetov, Sergeı Nasyrov, Agroýnıversıtettiń baspasóz hatshysy Aıjan Jumabaeva sekildi eren eńbek ıeleriniń jarqyn beınesi jańǵyrdy.
Astana qalasy ákimdiginiń qoldaýymen, «Uly Dala qyrandary» qoǵamdyq mádenı-áleýmettik qozǵalysynyń uıymdastyrýymen júzege asqan keshte áriptes-qalamgerlerdi eske alyp, olardyń shyǵarmashylyq jolyndaǵy jetistikteri men eren eńbekteri jáne ómir joldary týraly eskirmes estelikter aıtyldy.
Raýan QAIDAR, «Egemen Qazaqstan»