Ájem ekeýmiz keshkilik poıyzdan túsip, alasa bir dóńniń etegindegi shaǵyn aýylǵa keldik. Munda toı bolyp jatyr eken.
Esik aldyndaǵy qaz-qatar tizilgen samaýryndar saqyldap qaınap tur. Úlken qazanǵa et asylypty. Arsa-arsa aǵash qaqpaqtyń arasynan yp-ystyq bý burqyraıdy. Men ájemniń eteginen ustap, jan-jaǵyma jaltaqtap qaraı beremin. Kenet mal qoranyń tasasynan shyǵa kelgen bir top bala bizge qaraı júgirdi. Eń aldyndaǵy bireýi:
– E-eı, qarańdar! Qanat kele jatyr! Qanat! – dep qýana aıǵaılaıdy. Sol sol-aq eken, onyń sońyndaǵylar da qosylyp:
– Ý-ý-ý, Qanat! Qanat kele jatyr! – dep shýlady.
Sodan soń bizge jaqyndaı bere bireýi:
– Jo-o-oq, ol emes eken! – dedi qalt toqtap.
Áp-sátte bári irkilip, álginiń janyna úımeleı qaldy.
«Ol emes eken... Qanat emes eken...» dep jatyr bir-birine sybyrlap.
Taban astynda jańaǵy qýanyshtarynyń sý sepkendeı basylyp, bóten bala bolyp shyqqanyma tańdanyp, úrpıisip qalǵan sııaqty. Tap sol sátte men de ózimniń Qanat bolmaǵanyma ishteı ókingendeı boldym...
Nurǵalı Oraz, «Egemen Qazaqstan»