Halqymyzda «Júıeli sóz júlgesin tabady, júıesiz sóz ıesin tabady» degen ulaǵatty sóz bar. Baýyrlas halyqtarǵa ortaq osy ataly sóz Atambaevqa qaraı aıtylǵandaı kórinedi bul kúnde.
Bulaı deýimizdiń ózindik sebebi bar. Keshe Qyrǵyz basshysy Almazbek Atambaev óziniń prezıdent retindegi sońǵy baspasóz máslıhatyn ótkizdi. Kópshilik odan osyǵan deıingi ańdamaı sóılegen qateligi úshin keshirim suraýyn kútkeni anyq. Alaıda ókinishke qaraı, ol ózi búldirgen jaǵdaıdy túzetýdiń ornyna burynǵy ádetine qaıta basty.
Nesin jasyraıyq, sońǵy kezderi san ǵasyrlyq tarıhy bar ózara yntymaqtastyqtyń, týystyq jarasymdy baılanystardyń irgetasyna syzat túsirgendeı bolǵan bul jaıtty qansha jerden sanamyzdan alystatýǵa tyrysqanymyzben kórshiles eldiń eń joǵary minberinen bastaý alyp, aqparat keńistigin sharlap ketken jaǵymsyz habarlar júregimizge shanshýdaı qadalýda.
Barshaǵa belgili, Almazbek Atambaev Qyrǵyzstandy sońǵy 6 jyl boıy basqaryp keldi. Sarapshylardyń aıtýynsha, osy ýaqyt aralyǵynda Qyrǵyzstan prezıdenti ekonomıkalyq jáne áleýmettik oń kórsetkishterge qol jetkize almady. Bıýdjet tapshylyǵy men syrtqy qaryz rekordtyq deńgeıge jetken. Sondyqtan bolsa kerek, qoshtasyp jatqan basshy eldi biriktirýdiń ornyna araǵa jik salyp, óziniń tıimsiz el basqarýyn jurttan kórýdi ádetke aınaldyrǵan syńaıly.
Eldi biriktirip, syrtqy baılanystardy kúsheıtýdiń ornyna Atambaev myrza birese Qazaqstandy, endi birde О́zbekstandy, tipti shalǵaıdaǵy AQSh-ty aıyptaǵan málimdeme jasady. Sońǵy kezderi Ázerbaıjan men Túrkııa sekildi baýyrlas eldermen de qarym-qatynasyn qıyndata tústi. Syrtqy «jaýdy» túgendegen soń ol óz eliniń azamattaryna shúılikti. Máselen, bıliktiń beıbit jolmen aýysýyna bar jaǵdaıdy jasap, óziniń prezıdent bolýyna yqpal etken Roza Otynbaevany kórshi eldermen týyndaǵan máselelerdi dıplomatııalyq jolmen sheshkeni úshin aıyptady. Odan qala, ózine qajetti zańdy qabyldamaǵan Joǵarǵy Keńes depýtattaryn qaralap, kásipkerlerdi eldiń jaýy etip kórsetkisi keldi. Derttiń asqynǵany sonsha, qarapaıym el turǵyndaryna – talastyq qyrǵyzdarǵa shúıligip, aýyr sózder aıtty. Ashýǵa býlyqqan Talas jurtshylyǵy prezıdenttiń bul sózderi qyrǵyz azamattarynyń shamyna tıip, halyq arasyna jik salǵanyn, adamdardy olaı bólýge bolmaıtynyn aıtyp, keshirim suraýdy talap etti.
Enshisi bólinbegen aıyrqalpaqty aǵaıyn jurt ta basshylarynyń oqys áreketin túsinbeı qalǵan sııaqty. Qyrǵyzstannyń burynǵy memlekettik hatshysy Osmonakýn Ibraımov «Egemenge» jarııalanǵan maqalasynda Atambaevtyń Qazaqstanǵa qatysty pikirin múldem orynsyz sanap, eki eldi birlikke shaqyrady. Sol sııaqty «Bútin Qyrǵyzstan» partııasynyń basshysy Adahan Madýmarov baýyrlas eki eldiń arasyna eshkim syna qaǵa almaıtynyn aıta kelip, Qazaqstan Prezıdenti Nursultan Nazarbaevqa ótinishin bildirgeni esimizde.
Jalǵan – jarǵa jyǵady. Basshynyń bári bilikti, paıymy kemel, tanymy tereń, parasaty mol kisi bolmaýy múmkin. Biraq el senimi men jurt jaýapkershiligin arqalaǵan adam jalǵan sóılemeýi tıis. Osy ýaqytqa deıin A.Atambaevtyń Qazaqstan Prezıdentine degen jyly lebizderin aıamaı bildirip kelgeni málim. Máselen, 2011 jyldyń 4 aqpanynda Qazaqstanǵa resmı saparynda: «Biz qazaq halqynyń baýyrmaldyq kómegin jáne qoldaýyn árkez kórip, sezip kelemiz. Ásirese Qyrǵyz eli úshin 2010 jylǵy aýyr kezeńde ony óte qatty sezindik» degen bolatyn. Al 2014 jyldyń 7 qarashasynda: «Nursultan Ábishuly, men kóp adamdy maqtaı bermeımin, biraq Siz týraly ylǵı jaqsy dúnıeler aıtqym kelip turady. Siz, Nursultan Ábishuly, shyn máninde, kóńili keń uly adamsyz jáne sol úshin de Qudaı Sizdi jaqsy kóretin sekildi. Sol úshin de Sizge jáne Qazaqstanǵa osyndaı kóp jaqsylyqty tógip beretin sekildi. Osy ýaqytqa deıin Qazaqstanda úlken damý sekirisi jasaldy», degen sózdi aıtty. Araǵa bir jyl salyp, 2015 jyldyń 12 tamyzynda: «Qyrǵyzstanda Nursultan Nazarbaev sııaqty prezıdent bolmaǵandyqtan biz damýda osylaı birshama artta qalyp qoıdyq», dep aǵynan jaryldy. Atambaevtyń Qazaqstan Prezıdenti týraly aıtqan jyly sózderi munymen shektelmegeni belgili. Al endi merzimi aıaqtalyp, qyzmetinen keter ýaqyttaǵy oǵash qylyq, qıǵash sózi memleket basshysy turmaq, qarapaıym adamshylyqpen qabysa bermeıtini anyq...
Almazbek Atambaevtyń prezıdenttik merzimi sanaýly kúnde aıaqtalady. Onyń japsarlas jatqan jekjat jurttyń jadynda jaqsy atpen qalýyna mol múmkindigi bar edi. Tarıhty keri aınaldyra almaısyń. Endi jańa prezıdent Jeenbekov parasattylyq tanytyp, jaǵdaıdy túzeıdi dep senemiz.
Darhan QYDYRÁLI, «Egemen Qazaqstan»