Ortalyq kommýnıkasııalar qyzmetinde «Qazaqstan» telearnasynyń tapsyrysy boıynsha túsirilgen «Balet. Bekzada óner besigi» derekti fılminiń tanystyrý rásimi ótti. Sharaǵa «Qazaqstan» ulttyq telearnasynyń dırektory Asqar Áshimov, fılmniń avtory jáne prodıýseri Dınara Sátjan jáne Qazaq ulttyq horeografııa akademııasynyń ókilderi qatysty.
«Balet. Bekzada óner besigi» derekti fılmi Astana qalasynda 2016 jyly Elbasynyń qoldaýymen ashylǵan Qazaq ulttyq horeografııa akademııasynyń tynys-tirshiligin sýretteıdi.
«Qazaqstan» telearnasynyń dırektory Asqar Áshimovtiń aıtýynsha, Ulttyq arna derekti fılmderdiń túsirilimine, onyń ishinde derekti jýrnalıstıkaǵa da erekshe mán beredi.
«Bıyl birneshe derekti fılm túsirdik. Elimizdiń tarıhı tulǵalary jaıly túsirilgen «Uly dala ulaǵaty», Qazaqstannyń tabıǵı eskertkishterimen tanystyratyn «Kıeli Qazaqstan» jáne taǵy da birneshe derekti fılm jaryq kórdi. Búgin sizderge usynyp otyrǵan «Balet. Bekzada óner besigi» Elbasymyzdyń ıdeıasymen júzege asqan mádenı nysandar týraly derekti fılmder toptamasynyń alǵashqy týyndysy. Osyndaı biregeı týyndylar jasaýdy ári qaraı jalǵastyramyz. Máselen, kelesi fılmderde Nazarbaev Ýnıversıtet, Nazarbaev zııatkerlik mektepteri, «Astana» prezıdenttik kásibı sport kesheni sııaqty t.b. nysandardy negizge alatyn bolamyz», dedi ol.
Derekti fılmniń túsirilim jumystary Horeografııa akademııasynda, Taraz qalasyndaǵy Kámıla Ormanovanyń shańyraǵynda jáne kishkentaı Álıdiń týyp-ósken jeri Shyǵys Qazaqstan oblysynyń Glýbokoe aýylynda ótken.
Jobanyń avtory jáne prodıýseri Dınara Sátjannyń aıtýynsha, fılmniń basty ıdeıasy balet ártisi mamandyǵynyń qyr-syryn kórsetýmen qatar, balalardyń kúndelikti turmys-tirshiligin, sondaı-aq bul mamandyqtyń úlken eńbekqorlyqty talap etetinin jetkizý bolyp tabylady.
«Jalpy aıtqanda, Horeografııa akademııasynda tárbıelenip júrgen kishkentaı keıipkerlerdiń kózimen shynaıy jaǵdaıdy kórsetkimiz keledi. Eń bastysy Qazaqstannyń túkpir-túkpirinde turatyn kez kelgen talantty bala áleýmettik jaǵdaıyna qaramastan osy oqý ornyna esh kedergisiz túse alatynyn kórsetýge umtyldyq. Derekti fılm 21-23 qarasha aralyǵynda «Kinopark» kınoteatrlar jelisine qarasty Astana, Almaty, Shymkent jáne Aqtóbe qalalaryndaǵy kınozaldarda kórsetiletin bolady. Barlyq kelýshilerge kirý tegin. Jáne «Qazaqstan» ulttyq telearnasynan 2 jeltoqsan kúni beriledi. Odan bólek, biz bul jobany basqa tilderge de aýdaryp, halyqaralyq derekti fılmderdiń festıvaline qatystyrǵymyz keledi», dedi D.Sátjan.
Raýan QAIDAR, «Egemen Qazaqstan»