Búgin Premer-Mınıstr Baqytjan Saǵyntaevtyń tóraǵalyǵymen ótken Úkimet otyrysynda «Sıfrlyq Qazaqstan» memlekettik baǵdarlamasynyń jobasy qaraldy. Aqparat jáne kommýnıkasııalar mınıstri Dáýren Abaev ekonomıkany sıfrlandyrý tıimdiligi 2025 jylǵa qaraı qosylǵan qundy 1,7-2,2 trln teńgege jetkizýge jol ashatynyn aıtty, dep habarlaıdy Úkimettiń baspasóz qyzmeti.
Dáýren Abaev «Sıfrlyq Qazaqstan» memlekettik baǵdarlamasy 2018-2022 jyldarǵa arnalǵanyn, jáne ol elimizdiń aldyńǵy qatarly salalaryn tehnologııalyq jańǵyrtýǵa qosymsha serpin beretinin, eńbek ónimdiliginiń uzaqmerzimdi ári aýqymdy damýyna jaǵdaı jasaıtynyn atap ótti.
Baǵdarlama ony iske asyrýdyń bes negizgi baǵytynan turady:
«Ekonomıka salalaryn sıfrlandyrý»; «Sıfrlyq memleketke kóshý»; «Sıfrlyq Jibek jolyn iske asyrý»; «Adam kapıtalyn damytý»; «Innovasııalyq ekojúıe qurý».Osy bes baǵyt boıynsha 17 bastama men 120 is-shara uıymdastyryldy. 12 maqsatty ındıkator usynylady.
«Baǵdarlama qosylǵan qundy qalyptastyrý jáne ekonomıkadaǵy shyǵyndardy qysqartý turǵysynan aıtarlyqtaı áleýetke ıe, bul 2025 jyldan bastap jylyna 4,5-5% deńgeıinde el JIО́-niń ósý qarqynyn qamtamasyz etýge múmkindik beredi, shamamen 1,6-2,2%, ıaǵnı, úshten bir bóligi tek sıfrlandyrylýǵa jumsalady», dedi mınıstr.
Aldyn ala esepteý boıynsha, 2025 jylǵa qaraı ekonomıkany sıfrlandyrýdyń tikeleı áseri 1,7-2,2 trln teńgege qosymsha qundy qurýǵa múmkindik beredi, bul 2025 jylǵa qaraı jeke ınvestısııalardy esepke alǵanda jalpy ınvestısııalar kólemine ınvestısııalardyń qaıtarymyn 4,8-6,4 esege qamtamasyz etedi.
Otyrysta máseleni qaraý aıasynda «Zerde» UBH basqarma tóraǵasy Rýslan Eńsebaev, sarapshy Sergeı Perapechka sóz sóıledi, sondaı-aq, taqyrypqa qatysty Premer-Mınıstrdiń orynbasary Asqar Jumaǵalıev túsinikteme berip ótti.
Máseleni qaraý qorytyndysy boıynsha Úkimet «Sıfrlyq Qazaqstan» baǵdarlamasynyń usynylǵan jobasyn qoldady.