Kúni keshe ǵana Astana qalasynda Memleket basshysy Nursultan Nazarbaevtyń qatysýymen «Jańa ındýstrııalandyrý: Qazaqstandyq barystyń qadamy» ulttyq telekópiri ótip, onda Elbasyna elimizdiń ár óńirindegi Indýstrııalandyrý kartasynyń jobalary tanystyrylǵan bolatyn. Sondaı-aq, elimizdegi jańa ozyq tehnologııaly birqatar óńdeýshi óndiristik nysan iske qosyldy.
Osy oraıda Elbasy Jambyl oblysyndaǵy eki kásiporynnyń jumysyn bastaýǵa pármen berdi. Atalǵan nysandar Moıynqum aýdanynyń óndiristik aımaǵynda ornalasqan. «Orgstroı» jaýapkershiligi shekteýli seriktestigi qurylysqa qajetti granıt óndirýmen aınalysady. Sondyqtan atalǵan seriktestiktiń ónimine suranys joǵary. Údemeli ındýstrııalyq-ınnovasııalyq damýdyń memlekettik baǵdarlamasy aıasynda jumysyn bastaǵan seriktestik bul kúnde qaıta óńdeý zaýytyn paıdalanýǵa berdi. Sol arqyly tabıǵı granıtti óńdeýdiń jańa tásilin engizýdiń alǵashqy kezeńin aıaqtady.
Búginde kásiporyn óndiris kólemin 5 esege arttyrý múmkindigine ıe bolyp, qazir munda jyl saıyn 800 myń tekshemetr plıta, granıtti tósemder men 200 myń tonna bordıýr óndiriledi. О́nimniń 60 paıyzy TMD elderine eksporttalýda.
Elbasy jumysyn bastaýǵa pármen bergen ekinshi nysan Moıynqum aýdanyndaǵy «Altyn almas» AQ. Atalǵan kásiporyn Aqbaqaı fılıaly negizinen quramynda altyn-kúmisi bar ken óndirip, óńdeýdi júzege asyrady. Irgetasy qalanǵanyna bıyl altynshy jyl tolyp otyrǵan óndiris ornynda búginde «Sıfrly kenish» jobasy júzege asyrylýda. Atalǵan joba boljam boıynsha 2018-2020 jyldary 472 249 myń dollardyń 12 628 kılogramm ónimin óndirý áleýetine ıe. Aǵymdaǵy jyldyń on aıy kóleminde munda 1413 kılogramm altyn men 324 kılogramm kúmis óndirilgen. Búginde kásiporyn barlyǵy 1031 adamdy jumyspen qamtyp otyr.
Hamıt Esaman,
«Egemen Qazaqstan»
Jambyl oblysy