Nazarbaev ortalyǵynda jas jazýshylarǵa arnalǵan «Altyn tobylǵy» jyl saıynǵy respýblıkalyq baıqaýynyń qorytyndysy boıynsha Qazaqstannyń eń úzdik jas jazýshylary marapattaldy. Is-shara Táýelsizdik kúnine oraı uıymdastyrylǵan.
Baıqaý jyl saıyn QR Tuńǵysh Prezıdenti – Elbasynyń qorymen, sonymen qatar Qazaqstan Jazýshylar odaǵy men Memlekettik tildi damytý qorynyń qoldaýymen ótkizilýde. Baıqaýdyń negizgi maqsaty – ulttyq ádebıette jańa esimderdi qalyptastyrý jáne jas qalamgerlerdiń ómirlik fılosofııasyn kórsetetin qazirgi zamanǵy ádebıetke qoǵamnyń qyzyǵýshylyǵyn arttyrý.
Baıqaýǵa elimizdiń 18-35 jas aralyǵyndaǵy jas daryndar qatysty. Budan buryn esh jerde jarııalanbaǵan týyndylar ǵana qabyldandy. «Altyn Tobylǵy» syılyǵy «Úzdik proza», «Úzdik poezııa», «Úzdik dramatýrgııa», «Úzdik balalarǵa arnalǵan shyǵarma» jáne «Týǵan el» arnaıy nomınasııalary boıynsha berildi.
Marapattaý rásimi barysynda QR Tuńǵysh Prezıdenti – Elbasy qorynyń atqarýshy dırektory Jumabaev Qanat: «Altyn tobylǵy» baıqaýy Qazaqstannyń jas talanttaryn qoldaýǵa baǵyttalǵan jáne olardyń ádebıet salasyndaǵy shyǵarmashylyq áleýetin kópshilikke tanymal etýge múmkindik beredi. Jas aqyn-jazýshylar, prozaıkter men dramatýrgterdiń jańa esimderi elge tanymal bolyp, shyǵarmalary qazirgi zamanǵy ádebıette laıyqty orynǵa ıe bolýda. Osyndaı baıqaýlardyń kómegimen qazaqtyń ataqty aqyn – jazýshylary Abaı Qunanbaev, Sáken Seıfýllın, Muhtar Áýezov sııaqty bolashaqta jaryq juldyzdar shyǵady degen úmittemin. Bıyl biz «Altyn tobylǵy» baıqaýynyń 2015 jáne 2016 jylǵy úzdik jumystarynan turatyn kitap basyp shyǵardyq. Al búgin 2017 jyldyń úzdik qalamgerlerin marapattap otyrmyz. Jeńimpazdarymyzdy shyn júrekten quttyqtaımyn!», dedi.
Shyǵarmalardy elimizdiń tanymal mádenıet qaıratkerleri, aqyn-jazýshylar jáne jýrnalısterden qurylǵan Qazylar alqasy saraptady. Qazylar alqasyn Qazaqstannyń jazýshylar odaǵynyń basqarma tóraǵasy Orazalın Nurlan basqardy. Baıqaýǵa usynylǵan jumystar janrǵa sáıkestik, oılaý derbestigi, avtorlyq ustanym, baıandaý rettiligi men maǵynalylyǵy, ıdeıa ereksheligi, ádebı-kórkem qundylyǵy, kórkemdik qııal men shyǵarmashylyq kózqaras, estetıkalyq áser tereńdigi sııaqty ólshemder boıynsha baǵalandy. Baıqaýǵa usynylǵan týyndylardy baǵalaý ádildigi barynsha joǵary bolý úshin shyǵarma laqap atpen qabyldanyp, saraptaý kezinde qazylyr alqasy shyǵarmalar avtorlarynyń esimderin bilmedi. Baıqaý jeńimpazdary: «Úzdik proza» nomınasııasy boıynsha – Beıbit Sarybaı. Syılyq qory – 1 000 000 tg; «Úzdik poezııa» nomınasııasy boıynsha – Mereı Qart jáne Ularbek Nurǵalym. Syılyq qory – árbir jeńipmazǵa 750 000 teńgeden; «Balalarǵa arnalǵan úzdik shyǵarma» nomınasııasy boıynsha – Álmash Aısulý Joltaıqyzy jáne Týrehanova Zaýre Galymbekovna. Syılyq qory – árbir jeńimpazǵa 750 000 teńgeden; «Týǵan el» taqyrybyna arnalǵan úzdik ádebı týyndy boıynsha – Maqpal Mysa atandy. Syılyq qory – 1 500 000 tg. Bıyl, ókinishke oraı, «Úzdik dramatýrgııa» nomınasııasy boıynsha baıqaýdyń barlyq sharttaryna sáıkes keletin jumystar bolmady.
QR Tuńǵysh Prezıdenti – Elbasynyń Qory «Altyn Tobylǵy» ádebıet syılyǵyn alǵash ret 2015 jyly taǵaıyndaǵan. Baıqaý elimizdiń shyǵarmashyl daryndy jastaryn qoldaýǵa arnalǵan Tuńǵysh Prezıdent qorynyń jobalarynyń biri.
Baǵashar Tursynbaıuly,
Sýretti túsirgen Erlan OMAR,
«Egemen Qazaqstan»