Búgin Shymkent qalasyndaǵy ákimshilik-iskerlik ortalyǵynda zaman talabyna saı jabdyqtalǵan jańa 1200 oryndyq mektep paıdalanýǵa berildi.
№130 jalpy orta mektebiniń ashylý saltanatyna qatysqan Ońtústik Qazaqstan oblysynyń ákimi Janseıit Túımebaev el Táýelsizdigi merekesi qarsańynda esigin aıqara ashyp otyrǵan mektep jańa bastamalarǵa baı ekenin atap ótti.
«Bilimniń deńgeıin kóterý úshin mekteptiń sapasy jaqsy bolýy kerek. Bul osyndaı qaǵıdatpen salynǵan bilim uıasy. Balalar salaýatty ómir saltyn ustaný úshin barlyq jaǵdaı jasalǵan. Munda 3 birdeı sport zaly bar. Sondaı-aq, mektepte tigin, aǵash ustasy syndy túrli úıirmelerdiń jumys jasaýyna múmkindik mol. Iаǵnı, munda bilim alǵan oqýshy ámbebap bolyp qalyptasady. Munyń barlyǵy Elbasy saıasatynyń nátıjesi», - dedi oblys ákimi.
«Nurly jol» baǵdarlamasy aıasynda ashylyp otyrǵan bilim ordasynda oqýshylarǵa arnalǵan 61 oqý bólmesi men jańa úlgidegi bıologııa, fızıka, hımııa, ınformatıka, mýltımedııaly-lıngofondy kabınetter, kitaphana, ashana, akt, sport zaldary men sport alańy, qyzdarǵa jáne uldarǵa arnalǵan sheberhanalar qarastyrylǵan.
Jalpy Ońtústik Qazaqstan oblysy boıynsha bilim berý salasynda osy jyly 82 nysannyń qurylysyna 29,8 mlrd. teńge kóleminde qarjy qaralyp, qurylystary júrgizilýde. Onyń ishinde osy jyly 32 nysan paıdalanýǵa tapsyrý josparlanǵan. Al búgingi kúnge deıin 28 mektep ashylǵan bolsa, jyl sońyna deıin qalǵan bilim oshaqtary el ıgiligine beriledi. Al qalǵan 50 nysan keler jylǵa ótpeli.
Atalǵan 82 nysannyń 67-i mektep, 10-y qosymsha qurylys, 2-i qaıta qurý, 1-i kolledj, 2-i kolledjdiń qosymsha qurylystary.