О́skemendegi Jibek matalar kombınaty (JMK) yqsham aýdanyndaǵy eń úlken kóshelerdiń biri Karl Marks dańǵylyna qazaqtyń úsh bıiniń biri, kórnekti memleket jáne qoǵam qaıratkeri qaz daýysty Qazybek bıdiń esimi berilýi múmkin. Shahardaǵy oblystyq sottyń ujymy men JMK yqshamaýdanynyń aqsaqaldar alqasy qalalyq ákimdikke osyndaı usynys bildirip, hat joldapty. Osyǵan oraı О́skemen qalalyq ákimdiginde qalalyq máslıhat depýttary men shahar turǵyndarynyń qatysýymen qoǵamdyq tyńdaý ótti.
Qoǵamdyq tyńdaýdy júrgizgen qalalyq máslıhat depýtaty, «Nur Otan» partııasy О́skemen qalalyq fılıaly tóraǵasynyń orynbasary Maırash Ekibasova jıyn barysynda kóshe ataýyn qaıta ataýǵa qatysty usynys biraýyzdan qoldaý tapqanyn, tek bir depýtat tarapynan «bul jumys sol kóshe turǵyndarynyń qaltasyna salmaq salmaı ma?» degen saýal qoıylǵanyn, oǵan qala ákiminiń orynbasary Olga Býlavkına tıisti jaýap bergenin aıtty.
Qalalyq máslıhat depýtattary tarapynan qoldaý tapqan usynys endi respýblıkalyq onomastıkalyq komıssııada qaralady.
Azamat QASYM,
«Egemen Qazaqstan»
О́SKEMEN