Búgin Shymkent qalasynda oblystyń ár túkpirinen kelgen balalarǵa arnalǵan Qazaqstan Respýblıkasy Prezıdentiniń jańa jyldyq shyrshasy ótti.
Merekelik shyrshaǵa qatysqan balalarǵa teleekran arqyly Elbasynyń arnaıy quttyqtaýy kórsetilip, «Asqaq ordam - Astana» ataýymen shyraǵyn jaqqan jasyl shyrsha janynda halyqaralyq konkýrstarda júldeli oryndarǵa ıe bolǵan bıshiler men búldirshinder óner kórsetti.
Saltanatty sharaǵa qatysqan oblys ákimi Janseıit Túımebaev balalardy merekemen quttyqtap, Prezıdenttiń atynan 200 balaǵa qystyq jyly kıimder men noýtbýk úlestirdi.
«Sizder, búgin Prezıdenttik Jańa jyldyq shyrshasyna qatysyp otyrsyzdar! Bul - Elbasymyz Nursultan Ábishuly Nazarbaevtyń elimizdiń jarqyn bolashaǵy – Sizderge degen úlken qurmeti. Jańa jyl – barsha qazaqstandyqtarǵa jáne kóptegen memleketter úshin de erekshe yqylas, zor úmitpen keler jyldan jaqsylyq kútetin mereke. Búgingi mereke men syılyqtar senderge esten ketpeıtin, erekshe jarqyn kún syılasyn. Men senderge zor densaýlyq, baqyt tileımin. Jańa jyl qutty bolsyn!»,-dedi ákim.
2017 jyldy ońtústikqazaqstandyq oqýshylary tolymdy jetistiktermen qorytyndylap otyr. Elbasymyz Nursultan Ábishuly Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda oblys ortalyǵynda 1 maýsym kúni balalar men jastardyń mýzykalyq orkestrleri men ansamblderiniń Sherýi tuńǵysh ret ótkizilip, respýblıkalyq deńgeıde joǵarǵy baǵaǵa ıe boldy.
Sondaı-aq, respýblıkada tuńǵysh ret «Qazaqstan balalary sheksiz álemde!» atty shyǵarmashylyq kıno festıvali Ońtústik óńirde birinshi ret uıymdastyrylyp, nátıjesinde oblystyń komandasy II júldeli oryndy ıelendi.
Jalpy bilim beretin pánderdiń jaratylystaný-matematıka baǵyty boıynsha ótken respýblıkalyq olımpıadada Ońtústik Qazaqstan oblysynan qatysqan 40 oqýshynyń 16-y júldeger atansa, qoǵamdyq - gýmanıtarlyq baǵytyndaǵy pánder boıynsha qatysqan 35 oqýshynyń 14-i júldeli oryndardy ıelendi. Sondaı-aq, Prezıdenttik olımpıadaǵa oblystan qatysqan 8 oqýshynyń 4-eýi úzdik shyqty. Qoryta aıtqanda, jalpy halyqaralyq, respýblıkalyq ıntellektýaldyq konkýrstarǵa bizdiń oblystan qatysqan 6673 oqýshy jeńimpaz atandy.