Shvesııanyń áılemge tanymal Ikea jıhazdar dúkeniniń jelisin qurǵan Ingvar Kampard qaıtys boldy. 91 jastaǵy kásipker Smoland provınsııasyndaǵy úıinde kóz jumdy. Bul týraly BBC habarlady.
Ikea kompanııasynyń resmı habarlamasynda Kampard ótken ǵasyrdaǵy úzdik kásipkerlerdiń biri bolǵany týraly aıtylǵan.
«Ingvar Kamprad ómiriniń sońyna deıin óz salasynda tynbaı eńbektenip keldi. Ol bilikti kásipker retinde este qalady. О́mirinde úlken jetistikterge jetkenmen, «jumysymnyń basym bóligi áli alda» degen maqsatpen ómir súrdi», dep jazylǵan Ikea habarlamasynda.
Kampard 2013 jyly 87 jasynda dırektorlar keńesindegi qyzmetinen óz erkimen ketken.
Ol oqýshy kúninen kórshilerine sirińke satyp, kásippen aınalysqan. Osylaı tájirıbe jınaǵan ol nebári 17 jasynda Ikea dúkender jelisin qurdy.
Kompanııaǵa jetekshilik etken jyldary ol Eýropadaǵy dáýletti adamdardyń tiziminde biraz ýaqyt kósh bastap turdy. Degenmen Kamprad únemshiligimen de kópshilikti tańǵaldyratyn. Saıahatqa ol ylǵı ekonomıkalyq klaspen shyǵýdy, jumysyna tek avtobýspen qatynaýdy ári arzandaý kıim kııýdi jón kóretin.
Kampradtyń mundaı únemshildigi Ikea-diń negizgi ustanymdarynyń biri boldy. Kompanııa tutynýshylardyń arzan baǵada jıhazdar satyp alýyna jaǵdaı jasaýymen álemge tanylǵan.
«Munyń eshqandaı qupııasy joq. Eger arzan baǵada sapaly taýar satqyńyz kelse, shyǵyn kólemin azaıtýyńyz kerek, ıaǵnı bárine únemshilik etkenińiz jón. Kompanııa basshysy retinde úlgi kórsetpesem qyzmetkerlerimnen únemshilikti qalaı talap etemin? Sondyqtan aıyp ete kórmeńizder, sońǵy bir jylda galstýkty birinshi ret taǵyp otyrmyn», dep 2007 jyly kezekti ret qarapaıym minezimen kózge túsken.
1980 jyly suhbattarynyń birinde ol jıhaz óndirisimen aınalysýynyń birneshe sebebin baryn aıtqan.
«Olar dıstrýbısııa salasynda jetekshilik etip tur. Ásirese, qazirgideı sýpermarketter óz qyzmetin túbegeıli jańǵyrtýǵa májbúr bolǵan kezde mańyzdylyǵy joǵary», degen Ingvar Kamprad.
Ikea 1943 jyly qurylǵan. Qazirgi ýaqytta álemde kompanııanyń 389 dúkeni bar.
Al Ikea maǵynasy bylaısha qurylǵan: Ingvar Kamprad (IK), ózi ósken fermanyń ataýy – Elmtarıd (E) jáne kórshiles Agýnnarıýd (A) aýylynyń ataýy.