Oblys ortalyǵyndaǵy Q.Ábýseıitov atyndaǵy mádenı-saýyq ortalyǵynda qurylǵan ájeler ansambli «Saǵym jyldar» dep atalady. Ansambl quramynda án salatyn ájeler ótken jyldar ánderin áýeletip, qaıta oralmas jastyq shaqtyń saǵymdaı buldyraǵan kúnderin esińizge salady.
Ansambl ataýyn ájeler ózderi tańdaǵan. Ánshi Mádına Eralıeva oryndaǵan «Saǵyndym, saǵym jyldar» deıtin ánmen ansambldiń atalýynda mán bar. Aınalyp kelgen adamnyń búkil ómiri saǵynyshtan turady ǵoı. Ánniń ózi de, sózi de sol saǵynyshtyń sazdy ırimderi.
Ol ándi shyrqap jatqan ájelerdiń júzderi jarqyn, jandary jas. Árqaısy salıqaly urpaq ósirip, shóbere súıip otyrǵan ulaǵatty analar. О́mirleri de, kóńilderi de hosh. Biraq júrekteri saǵym jyldaryn saǵynady, deıdi ansambldiń mýzykalyq jetekshisi Qazıgúl Batyrhanqyzy.
Ansambldiń úlkeni Baqytjamal áje Eleýkenqyzy 71 jasta eken. Al zeınet jasyna jetken Qazıgúl Batyrhanqyzy, Lıýbov Nurǵazınova apalar burynǵy salyq qyzmetkerleri, Manat Battalqyzy kitaphanashy, Raýshan Meıramova medbıke, Kenje Qusaıynova esepshi, Roza Ahmetova aǵylshyn tili pániniń muǵalimi, Qarlyǵash Maýtına jeke kásipker, Jibek Qabylkenova polısııa bóliminde qyzmet jasapty. Ájeler ansambliniń kórkemdik jetekshisi Gaınýtdın Tashımov.
Ájelerdiń sondaı-aq bir boıynan birneshe ónerdi baıqaýǵa bolady. Án-qorjyndarynan syrly saz tógilse, úılerindegi sandyq, kebejelerinen túrli qolóner buıymdaryn kezdestiresiz. Osylardyń arasynda oblystyq, qalalyq deńgeıde ótkizilgen barlyq mádenı sharalarǵa belsendi qatysady. Ájelerdiń «Saǵym jyldar» ansamblin oblys ortalyǵyndaǵy Qarttar úıi, «Densaýlyq», «Ardager» sanatorııleri asyǵa kútedi.
«Zaǵıp jáne múmkindikteri shekteýli jandar úshin de jıi-jıi qaıyrymdylyq konsertterin ótkizemiz. Bizben qosylyp án aıtyp, kóńilderi sharyqtap,bir jasap qalady. Saǵym jyldar – ár júrekte júr. Án aıtyp qana qoımaı, baýyrsaq, qurt-irimshik, qymyz, qospa sııaqty ulttyq taǵamdardan aýyz tıgizip, shashý shashyp, tyńdaýshylardyń yqylastaryna bólenemiz», deıdi Baqytjamal áje.
Sondaı-aq atalmysh ansambl – oblystyq «Ertis» telearnasyndaǵy «Salt-dástúr» baǵdarlamasynyń turaqty qonaqtary. Baǵdarlamada bolashaq jastarǵa qazaqtyń ulttyq salt-dástúrleri jaıly keleli keńester aıtyp otyrady. Ásem ándi ájelerdi sonymen qatar G.Potanın, Buqar jyraý atyndaǵy mýzeıdiń, qalalyq, oblystyq kitaphanalaryndaǵy jastar únemi kezdesýge shaqyryp otyrady.
«Bizdiń ortalyqta mektep jasyndaǵy balalarǵa arnalǵan úıirmeler jumys isteıdi. Ájelerdiń sahnaǵa, merekelerge, kezdesýlerge kıip baratyn ulttyq kıimderiniń órnekteri óz qoldarymen jasalǵan. Ishi ánge, syrty sánge tolǵan ájeler ansamblin qurýdaǵy maqsatymyz – jastar da dástúrli halyq ánderin estip, olar da salt-dástúr, ulttyq qolónerdiń baı murasymen jaqyn tanyssa degen tilek», deıdi ortalyq dırektory Alma Arynova.
Farıda BYQAI, «Egemen Qazaqstan» PAVLODAR