Qaraǵandy oblystyq ishki ister departamentiniń konsýltatıvtik-keńesshi organy (KKO) 2018 jylǵy alǵashqy otyrysyn ótkizdi. О́ńirlik ishki ister organdary ardagerler keńesiniń jáne KKO tóraǵasy Juman Nurpeıisov tóraǵalyq etken jıynda Elbasynyń Qazaqstan halqyna arnaǵan Joldaýyndaǵy mindetterdi túsindirý barysy jáne uıymnyń halyqpen tyǵyz baılanysta bolý jaıy talqylandy.
2017 jyly KKO músheleri atyna turǵyndardan 10 ótinish kelip túsken eken. Onyń barlyǵy uıymnyń otyrystarynda talqylanyp, ótinish ıelerine naqty kómek kórsetilgen. Mysaly, 2017 jyldyń basynda Qaraǵandy qalasynyń turǵyny ótinish bildirip, alaıaqtardan qomaqty qarajatyn qaıtara almaı júrgendigi týraly shaǵymdanǵan. KKO músheleri Ortalyq polısııa bóliminiń basshylyǵy jáne prokýratýra organdarymen birlesip, qylmystyq istiń negizinde shaǵym ıesiniń 4 mıllıon teńgege jýyq aqshasyn qaıtarýǵa kómektesti.
«Konsýltatıvtik-keńesshi organnyń basty mindeti – halyqtyń polısııaǵa degen senimin arttyryp, ishki ister organdary qyzmetiniń ashyq júrgizilýine yqpal etý bolmaq. Oblystyń jer kólemi úlken bolǵandyqtan, shalǵaıdaǵy aýdandar men aýyldardaǵy turǵyndardyń túrli máseleler boıynsha aryz-shaǵymdaryn polısııaǵa jetkizý úshin bizben baılanysqa shyǵa almaı, qıyndyq kóretini ras. Sondyqtan konsýltatıvtik-keńesshi organ ókilderi alystaǵy eldi mekenderge baryp, halyqtyń aryz-shaǵymdaryn tikeleı qabyldaýy qajet. Sodan keıin olardy uıymnyń otyrystarynda talqylap, tıisti sheshimder qabyldaıtyn bolamyz», deıdi KKO tóraǵasy J.Nurpeıisov.
Jalpy, KKO músheleri polısııa jumysynyń ashyq júrgizilýin qadaǵalaý úshin kez kelgen ishki ister bólimderiniń ǵımaratyna kedergisiz kire alady. Konsýltatıvtik keńesshi organnyń quramynda jýrnalıster, úkimettik emes uıymdardyń jáne qoǵamdyq birlestikterdiń ókilderi bar. Organnyń jalpy músheleriniń sany 9 adam bolyp bekitilgen.
Qaırat ÁBILDA,
«Egemen Qazaqstan»
QARAǴANDY