Mańǵystaýdyń oıy men qyryndaǵy aýa raıy eki túrli, sebebi aıtpasa da túsinikti. Qazir oıdaǵy Aqtaýdyń turǵyndary qarsyz qysty bastan keship jatsa, qyrdaǵy halyq, ásirese mal ustap, sharýashylyq kúıttegender aqyrǵan aıaz, qursanǵan qar, ókpek jel ótinde – qystyń qyspaǵynda júr. Biraq aıtpaǵymyz ol emes...
Qysy qatty Saı-О́tes aýylynda qysy-jazy qulpyryp turatyn jylyjaı – aýyl maqtanyshy, áıtpese ózderi «tropıkalyq djýnglı» dep atamas edi. Jylyjaı aýyldaǵy mektep janyna ornalasqan. 2007 jyly mektep ǵımaratymen birge salynǵan jylyjaı san alýan gúli qysy-jazy jaıqalyp turatyn baqqa aınaldy.
Aıaz qysyp, qalyń qar qymtaǵan qysta sýburqaǵy atqylap, túrli gúl qulpyra jaınap turǵan mektep jylyjaıynyń janǵa erekshe jylylyq beretini anyq.
Tropıkalyq ósimdikter men jemisterdiń 74 túri ósip, ásemdik pen estetıka úılesim tapqan jylyjaıdyń tańǵajaıyp ósimdikter álemin óz kózimen kórýge yqylasy aýǵandar qatary kún sanap artyp keledi. Ár ósimdikke kútimmen qarap, qalaýyna saı qamqorlyq jasaý – muǵalimder men oqýshylardyń qyzǵylyqty jumysy. О́ıtkeni meıirimge bólengen ósimdikterdiń jaınaı ósip, jemisterdiń ónimdi kóp beretindigin biledi. Árqaısysyna erekshe kútim men qamqorlyq qajet.
– Jylyjaı mektepke, aýylǵa sán berip qana qoımaı, ujymnyń gúl, ósimdik álemine degen qyzyǵýshylyǵyn oıatty. Qazir mektebimizde «Gúl ósirýshiler» úıirmesi jumys isteıdi, oǵan qatysýǵa nıet etken oqýshylar sany az emes. Jylyjaı kútýshi mektep qyzmetkerleri Asylbek Qosbergenov pen Mahambet Jaǵalbaevtyń eńbekteri zor. Kópshilikti tánti etken tátti buryshtar men qııarlardy tamashalaý úshin oqýshylar keledi. Janǵa lázzat syılar hosh ıis, jyly lep, taza aýa, kóz tartar gúlder men baǵaly aǵashtar jyldyń tórt mezgilinde jaıqalyp turady. Bastysy, eseli eńbek jemisin berýde, – deıdi mektep dırektory A.Nazarova.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy