Reseıdegi áýe apatynda OQO týmasy da qaza boldy. Ushaqta bolǵan jolaýshylardyń biri Sergeı Panchenko Saıram aýdanynyń ortalyǵy - Aqsýkent aýylynda dúnıege kelgen, dep habarlaıdy QazAqparat.
Norılskıı qalalyq keńesiniń depýtaty jáne qalalyq damý agenttigin basqarǵan azamattyń ómirbaıanynda 1973 jyly 28 naýryzda Qazaqstannyń Shymkent oblysy, Belye vody aýlynda týǵan dep kórsetilgen. Reseıge qonys aýdarǵan soń Panchenko joǵary bilim alyp, magıstr jáne «Strategııalyq menedjment» boıynsha kelisimshart ákimshisi doktory dárejesin alǵan. «Severnyı gorod» kompanııasynda jumys istep, 2017 jyly Norılskıı qalalyq keńesiniń depýtaty atanǵan.
Málim bolǵandaı, áýe kemesinde Qyzylorda oblysynyń týmalary 33 jastaǵy Ilıa Stavskıı men 30 jastaǵy kelinshek bolǵan. Sonymen qatar ushaqty Orynbor oblysynyń turǵyny, qazaq ultynyń ókili Temirlan Aqnazarovtyń bar bolǵany anyqtalyp otyr.
Esterińizge sala keteıik, 11 aqpan kúni Máskeýdiń Domodedovo áýejaıynan kókke kóterilgen An-148 jolaýshylar ushaǵy kóp uzamaı radardan joǵalyp ketti. Keıin ushaq qaldyqtary Máskeý oblysynyń Ramensk aýdanynda tabylǵany málim etildi. «Saratov áýe jelileri» kompanııasyna tıesili ushaqtyń bortynda 65 jolaýshy men 6 ekıpaj múshesi boldy. Olardyń barlyǵy ashal qushty.
Reseı Federasııasy Tótenshe jaǵdaılar mınıstrliginiń resmı saıtynda ushaqta bolǵan barlyq jolaýshylar men ekıpaj músheleriniń aty-jónderi jarııalanǵan bolatyn. Ajal qushqan jolaýshylardyń úsheýi - bala.