Qazaq baspasóziniń qarashańyraǵy «Egemen Qazaqstan» gazetin bilmeıtin kózi qaraqty oqyrman joq desem, jańsaqtyq bola qoımas. Ǵasyrǵa jýyq tarıhy bar osy aǵa basylymdy meniń de serik etip kele jatqanyma uzaq jyldar boldy. Salmaqty basylymdaǵy salmaǵy basym dúnıelerdi, ásirese, orta jasty alqymdaǵan bizdiń býynnyń súıip oqıtynyna esh shúbá keltirmeımin.
Qaı kezde de halyqtyń joǵyn joqtap, muńyn muńdaıtyn irgeli basylymnyń bolashaǵy jarqyn bolaryna úmit zor. Osydan eki-úsh jyl buryn alash arystary irgetasyn qalaǵan bul gazettiń toqsan jyldyq torqaly toıyna Elbasy N.Á.Nazarbaevtyń arnaıy kelýi ata basylymǵa degen qurmettiń belgisi boldy. Sondaı-aq onyń taralymynyń jyl sanap artyp kele jatqandyǵy da oǵan degen oqyrmandardyń ystyq yqylasynyń arta túskenin bildirse kerek. Árıne, bul rette gazet basshylyǵy men ondaǵy jýrnalısterdiń eren eńbekterin de aıtpaı ketýge bolmaıdy. Olardyń kúndiz-túni oqyrmandar úshin ıgi jumystar jasap jatqandyǵynyń arqasynda gazet taralymynyń óse túskendigi tikeleı eńbekke baılanysty ekenin aıtqan abzal. Men muny kásipker retinde, eńbektiń qadirin bir kisideı túsinetin jan retinde aıtyp otyrmyn.
Búginde oqyrmandaryn eldiń tynys- tirshiligimen, sondaı-aq aıyna bir ret jaryq kóretin tanymǵa toly «etjeńdi egemenimen» qaýyshtyryp otyrǵan gazet taralymynyń kóbeıe berýine nıettestigimdi bildirip, el gazetine elimiz Táýelsizdiginiń 20 jyldyq merekesi qurmetine ujymymyzdaǵy elý qyzmetkerdiń keler jylǵa jazylyp, belsendilik tanytqanyn aıtqym keledi. Bul kórsetkish aldaǵy ýaqytta da óz jalǵasyn taba beredi degen senimdemin.
Úmbet JÚSIPBAEV, «Iassy» konsorsıýmynyń tóraǵasy, qalalyq máslıhat depýtaty.
Ońtústik Qazaqstan oblysy, Túrkistan qalasy.