«Sportıng» – «Astana» kezdesýiniń qarsańynda portýgalııalyqtardyń bas bapkeri Jorjı Jezýsh jýrnalısterge suhbat berip, jaýapty match týraly óz pikirimen bólisti:
- Biz ár oıynshyǵa mán berip, oıynǵa baılanysty óz taktıkamyzdy ózgertip otyramyz. Qazaqstandaǵy kezdesýde jetken nátıjemiz, bizge erteńgi oıynda senimdilik beredi. Bizdiń joǵary nátıjege jetýge múmkindigimiz bar. Erteńgi kezdesýde bizge mindetti túrde jeńis qajet deı almaımyn. Nelikten? Sebebi, biz Portýgalııa chempıonatynda kóshbasshylar qataryndamyz. Eger bizdi «Portý» komandasymen salystyratyn bolsańyz, biz áldeqaıda senimdi jaǵdaıdamyz. Meniń oıymsha erteń eshqandaı erekshe jaǵdaı oryn almaıdy.
Fýtbolda erekshe oqıǵalardyń bolyp turatyn anyq. Sońǵy oıyn «Sportıngtiń» minezin kórsetti. Ol kezdesýde oıynshylar ózderiniń bir ujym ekendigin dáleldeı aldy. Qazaqstandaǵy nátıje bizdi qanaǵattandyrady. Sondyqtan, erteńgi oıynnyń nátıjesi meniń fýtbolshylaryma baılanysty.
- Siz Eýropa Lıgasyn jeńip alatyn múmkindikterińiz bar ekendigin aıttyńyz. Komandańyzdy qandaı ujymdarmen salystyra alasyz?
- Shırek fınalǵa nemese jartylaı fınalǵa joldama alý komandaǵa senimdilik beredi. Bul nátıje «Sportıngke» kómektesedi dep oılaımyn. Bizdiń qarsylastarymyz myqty boldy. Degenmen, bizdiń maqsatymyz – jeńis. Dál qazir ol – Eýropa Lıgasy. ÝEFA Eýropa Lıgasynda jeńiske jetken komanda Chempıondar Lıgasynyń toptyq kezeńine tikeleı joldama alatynyn eskersek, qazir bizde jaýapkershilik óte joǵary.
- «Astana» - «Sportıng» arsyndaǵy oıynda sizderdiń favorıt ekendikterińizdi barlyǵy biledi. Alaıda, Siz Astanadaǵy oıyn sońynda Stanımır Stoılovtyń qolyn almadyńyz. Sonda Siz qarsylasty syılamaısyz ba?
- Bul shyndyqqa múldem janaspaıdy. Men amandastym. Oıyn sońynda... Match aıaqtalǵan soń biz Stanımırmen Manýel Fernandesh týraly sóılestik.
- Astanadaǵy kezdesýde Fabıo Koentraý alańdaǵy oryn bosatqannan keıin, kózine jas aldy. Al ol jaǵdaıdy búkil álem kórdi. Fabıony ár oıynǵa daıyndaý Sizge qanshalyqty qıyn?
- Múmkin, bul jaǵdaı sizderge jańalyq shyǵar. Ol alańdaǵy ornyn erte bosatqannan keıin, ashýly boldy. Bizge oıynshy almastyrý – qalypty jaǵdaı. Ol erteńgi oıynda alańǵa shyǵyp qalatyn shyǵar. Ony erteń sheshemiz.
- Sizdiń bapker retindegi jarqyn sátterińiz «Benfıka» komandasymen baılanysty. Sizdiń ol komandaǵa oralǵyńyz keletindigi qanshalyqta shyndyqqa janasady?
- Árıne, men «Benfıka» komandasymen úlken jetistikterge qol jetkizdim. Men ol nátıjemmen maqtana alamyn. Men «Benfıkada» baqytty boldym jáne 10 birdeı júlde uttym. «Sportıng» bas bapkeri retinde, «Benfıkamen» jetken jetistigimdi qaıtalaǵym keledi.
Ermuhamed Máýlen
«Egemen Qazaqstan»