«Sportıng» – «Astana»kezdesýiniń qarsańynda elordalyq komanda bas bapkeri Stanımır Stoılov jýrnalısterge suhbat berip, jaýapty match týraly óz pikirimen bólisti:
- Astanadaǵy oıynnan keıin «Sportıng» sapynan kimdi erekshe atap óter edińiz?
- Men jekeleı oıynshylardy emes, komandanyń oıynyna basa mán beremin. «Sportıng» quramynda myqty oıynshylar jeterlik. Portýgalııalyq ujym sapynda oıyn taǵdyryn sheship kete alatyn birneshe oıynshy bar.
- Qazaqstandaǵy aıazdan keıin, Portýgalııadaǵy aýa temperatýrasyna beıimdelip úlgerdińizder me?
- Biz Dýbaıda dál osyndaı aýa raıynda daıyndaldyq. Komanda dál qazir jaqsy daıyndalyp jatyr. Bizdi kútip alyp, jattyǵý jumystaryna barynsha jaqsy jaǵdaı jasaǵan uıymdastyrýshylarǵa erekshe alǵys bildiremin.
- Stanımır, birinshi oıynda Iýrıı Logvınenko qyzyl qaǵaz alyp qaldy. Bul oıynshylardan bólek, erteńgi kezdesýde alańǵa shyǵa almaıtyn nemese jaraqaty bar qandaı oıynshylar bar? Jalpy komandanyń osy oıynǵa daıyndyǵy qalaı?
- Komanda quramynda birneshe máseleler bar. Iýrııdiń alańǵa shyqpaıtyny túsinikti. Jáne de Serikjan Mýjıkov alańǵa shyǵa almaıdy. Biz onyń densaýlyǵyna alańdaǵandyqtan, erteńgi kezdesýde alańǵa shyǵarýdy jón sanamaımyz. Odan bólek, komanda quramynda Eýropa Lıgasynyń tizimine ilinbegen fýtbolshylar bar. Komanda quramynda birinshi kezdesýmen salystyrǵanda aıtarlyqtaı ózgerister oryn almaıdy. Tek qorǵanysta ózgeris bolady. Al komandanyń daıyndyǵyna keler bolsaq, erteńgi kezdesýde uıymdasqan oıyn kórsetýge tyrysamyz. Oıynnyń qıyn bolatyndyǵyna qaramastan, Eýropa Lıgasynyń 1/16 fınalyna saı keletin, «Astana» komandasyna tán oıyn órnegin kórsetemiz.
- «Sportıng» komandasy eki kún buryn ishki birinshilikte óte qıyn ótkizdi. Búgingi baspasóz jıynynda «Sportıng» komandasynyń bas bapkeri erteńgi matchta jeńiske jetýdiń asa mańyzdy emes ekendigin tilge tıek etti. Osy turǵydan alǵanda, bul jaǵdaı Sizdiń komandaǵa qol bola ala ma?
- «Sportıng» sapynda alańǵa shyǵyp, ózderin dáleldeıtin oıynshylar jeterlik. Bizdiń oıyndaǵy kez kelgen qateligimiz, jeńiliske ákeletindigi anyq. Birinshi oıyndaǵy qarsylas soqqan goldar bizldiń qateligimizden kirdi. Sondyqtan, erteńgi kezdesýde barynsha saq oınap, óz oıynymyzdy kórsetýimiz qajet.
- Erteń, «Astana» komandasynyń bas bapkeri retinde Sizdiń sońǵy oıynyńyz bolýy múmkin be?
- Men qazir «Astana» komandasynyń bas bapkerimin. Sondyqtan, oıyn aldynda artyq eshteńe aıtqym kelmeıdi. Meniń komnadadaǵy ornym týraly, elge jetken soń sóılesetin bolamyz. Bizdiń bar oıymyz erteńgi kezdesýde.
- Astanadaǵy kezdesý aıaqtalǵannan keıin, «Sportıng» komandasyny Tvıtterdegi paraqshasy «Borat» týraly jazǵan bolatyn. Osy týraly ne aıtasyz?
- Men shyny kerek ony oqymadym. Sondyqtan, bul jaǵdaı týraly artyq eshteńe aıta almaımyn. «Sportıng» Eýropanyń myqty komandalarynyń biri. «Astana» komandasynyń osy kúnge deıin Eýropa Lıgasyndaǵy jetken jetistigi laıyqty dep senimmen aıta alamyn. Eger, dál osyndaı jaǵdaı oryn alǵan bolsa, «Sportıng» tarapy bizdiń klýbtan keshirim suraǵandary jón.
Ermuhamed Máýlen
«Egemen Qazaqstan»