Ermeksazdan Abaıdyń keýde músinin jasap otyrǵan aq halatty dáriger jigittiń óneri tańdandyrmaı qoımady. Osynyń aldynda ǵana Alash qaıratkeri Álıhan Bókeıhandy músindepti.
Dárigerlerdiń ishinen ánshisin, bıshisin, sportshysyn kezdestirýge bolady. Al músin jasaýmen aınalysatyndary ilýde bireý shyǵar. Dáriger Erjan Qazı qoly qalt etse, belgili tulǵalardyń keýde músinderin keıipteýmen aınalysady. Kúrshim aýdanynda týǵan ol kishkentaıynan beıneleýge beıim boldy. Ákesi omarta ustaǵannan keıin be, balaýyzdan túrli-túrli fıgýralar jasap, týǵan-týystaryna syıǵa tartatyn. Mektepti támamdaǵan soń, kásibı músinshi bolýdy da armandaǵan. Alaıda aǵa-ápkeleriniń izimen Astanadaǵy medısınalyq ýnıversıtetke oqýǵa túsedi. Oqyp júrgen kezinde qalada boı kóterip jatqan keıbir eskertkishterdiń jasalýyna kýá bolǵan. Kásibı músinshilerdiń sheberhanalaryna baryp, músindeýdiń qyr-syrymen tanysqan. Biraq arnaıy alǵan bilimi joq. Týma talant.
Búginde ol О́skemendegi oblystyq «Ana men bala» aýrýhanasynda rentgenolog. Áıteýir, ónerine qyzmetiniń esh kedergisi joq. Judyryqtaı músinderdi jumys ornynda otyryp-aq jasaı beredi. Erjannyń kolleksııasynda anımalıstik janrda jasaǵan músinder de jeterlik. Ásirese «Búrkit pen qasqyrdyń arpalysy» atty kompozısııasyndaǵy eki jaqtyń jan alysyp, jan berisý sáti óte tamasha shyqqan. Búrkittiń tóbeden qaharlana tónip kele jatqanyn, qasqyrdyń jalt burylyp, azýyn yrsıta ashyp qorǵanýyn ár bólshegine deıin mán berip jasaǵan.
«Aldaǵy ýaqytta Álıhan Bókeıhan, Mirjaqyp Dýlatov, Ahmet Baıtursynovtyń músinderin jasaýda ermeksazben shektelmeı, qoladan quıyp shyqsam degen oı bar», deıdi músinshi dáriger Erjan Qazı.
Qoladan quıý bir kúndik jumys emes. Ol úshin sılıkonnan qalyp jasaý qajet. Al sılıkon materıal О́skemende tapshy kórinedi. Tabylǵannyń ózinde arzan emes. Shyqqan shyǵyndy aqtaý úshin jasalǵan dúnıe baǵalanyp, kórmelerde satylymǵa shyǵarylýy kerek. Al músin satyp, paıda tabýdy kózdep júrgen Erjan emes.
Mereı QAINARULY
О́SKEMEN