Qaqaǵan qańtardyń ózinde bir sirkiretip jaýyp alatyn Ońtústiktiń aspany aqpan ortaımaı jatyp kóz jasyn jıi-jıi tógip jatyr. Al jyly jańbyr altynkúrek sııaqty taý bókterindegi qardy kúrt eritip, tasqynǵa soqtyrýy ábden yqtımal. Sondyqtan oblys ákimdigi sý tasqynynan keletin qaýiptiń aldyn alý sharalaryn erte qolǵa aldy.
Búgingi tańda aýdan, qalalarda tasqynǵa qarsy shtabtar qurylyp, táýliktik kezekshilik uıymdastyrylýda. Oblys aýmaǵyndaǵy barlyq sý qoımalary men ózen kólderge kúndelikti monıtorıng júrgizilip keledi. О́ńirdegi sý qoımalarynyń ortasha tolýy 35-60 paıyzdy quraıdy. Qańtar aıynyń sońynda aýa raıynyń sýyq bolýynyń saldarynan Syrdarııa ózeninde muz qatqan. Qazirgi tańda muz erigendikten, ózen boıynda ornalasqan aýdandarda jaǵdaı baqylaýǵa alynǵan. Ońtústik Qazaqstan oblysy ákimdigi tarapynan «Sý tasqyny qaýpiniń aldyn alý jáne joıý jónindegi 2017-2020 jyldarǵa arnalǵan is-sharalar kesheni» jol kartasyna 98 ınjenerlik shara engizilgen.
– Jol kartasyna sáıkes 2017 jyly 247 eldi mekende tótenshe jaǵdaıdyń aldyn alý jáne joıý boıynsha 42 shara uıymdastyryldy. Bul maqsatqa 3,5 mlrd teńge bólingen. Badam, Keles, Shaıan ózenderinde arna túzeý, qorǵaý dambalary jáne 2530 metr jaǵa bekitý men 3,08 shaqyrym bóget turǵyzý jumystary atqaryldy. Sondaı-aq 352,3 shaqyrymdyq burynnan bar dambalar nyǵaıtylyp, 49 shaqyrym jańa bógetter salyndy. Budan bólek, 52,5 shaqyrym ózen jaǵalaýlary bekitilip, 673,3 shaqyrym aryq-kanaldar, 397 birlik sý ótkizý qubyrlary tazalandy. Jergilikti halyqty habardar etý úshin dabyl berý qondyrǵylary satyp alyndy, – dedi oblys ákimi Janseıit Túımebaev.
Syrdarııa ózeni boıynda ornalasqan Shardara sý qoımasynyń syıymdylyǵy 5,2 mlrd tekshe metrdi quraıdy. Búgingi tańda munda sekýndyna myń tekshe metr sý aǵyp, onyń kólemi 3 mlrd 185 myń tekshe metrge jetken. Biraq qoımaǵa jınalǵan sý kólemi ótken jyldyń osy kezeńimen salystyrǵanda 1 mlrd 036 mln tekshe metrge az. Sondaı-aq qazirgi tańda Kóksaraı sý qoımasynda 1 mlrd 739 myń tekshe metr sý jınaldy.
Oblystyq bıýdjetten 18,5 mln teńge bólinip, jańadan salynatyn sý qoımalarynyń oryndaryna zertteý jumystary júrgizilgen. Sonyń nátıjesinde sý jınaqtaý kólemi 378,64 mln tekshe metrdi quraıtyn 26 sý qoımasyn salý qarastyrylyp jatyr.
Respýblıkalyq bıýdjetten sý jınaqtaý kólemi 340,5 tekshe metrlik 3 nysannyń qurylysy júrgiziledi.
Baqtııar TAIJAN,
«Egemen Qazaqstan»
Ońtústik Qazaqstan oblysy