Qazaqstan Respýblıkasynyń Syrtqy ister mınıstrligi men Qatar Memleketiniń Syrtqy ister mınıstrligi arasynda saıası konsýltasııalardyń birinshi raýndy barysynda eki el arasyndaǵy saıası, saýda-ekonomıkalyq jáne ınvestısııalyq, sondaı-aq mádenı-gýmanıtarlyq yntymaqtastyq máseleleri talqylandy, dep habarlaıdy SIM baspasóz qyzmeti.
Qazaqstan delegasııasyna syrtqy ister mınıstriniń orynbasary Aqylbek Kamaldınov basshylyq etti, Qatar delegasııasyna ‑ Qatar Memleketi Syrtqy ister mınıstrliginiń bas hatshysy Ahmad ben Hasan ál-Hamadı.
Taraptar ekijaqty jáne kópjaqty formattaǵy yntymaqtastyqty damytý jáne keńeıtý, qazirgi zamannyń ózekti máselelerin sheshý men ustanymdaryn úılestirýde halyqaralyq jáne óńirlik uıymdar sheńberinde ózara árekettesý, sondaı-aq syrtqy saıası bastamalaryn ózara qoldaý múmkindikteri joldaryn aıqyndady. Osy turǵyda Qazaqstannyń BUU Qaýipsizdik Keńesindegi turaqty emes músheligin nazarǵa ala otyryp, BUU sheńberinde eki eldiń birlesken is-qımylynyń mańyzdylyǵy aıryqsha atap ótildi.
Qazaqstan ekonomıkasyna ınvestısııalar tartý maqsatynda birlesken jobalardy júzege asyrýdyń jáne Joǵary deńgeıdegi birlesken komıssııa qyzmetin jandandyrý arqyly saýda-ekonomıkalyq jáne ınvestısııalyq baǵyttardaǵy yntymaqtastyqty nyǵaıtýdyń mańyzdylyǵy atalyp ótti.
Taraptar ekijaqty baılanystardy odan ári keńeıtýmen qatar, mádenıet, bilim jáne ǵylym salalaryndaǵy birlesken jobalardy júzege asyrýǵa ýaǵdalasty.