Qazaqstannyń Syrtqy ister mınıstrligi Máskeý oblysynyń Chehov aýdanyndaǵy Novoselkı selosynda mashına ishinde máıitteri tabylǵan qazaqstandyq úsh adamnyń Qostanaı oblysynyń 1965,1968,1971 jyly týǵan turǵyndary ekenin rastady.
Bolǵan oqıǵa marqumdardyń týystaryna habarlandy. Buryn buqaralyq aqparat quraldarynda Máskeý túbindegi Novoselkı selosynda úsh adam júk mashınasynyń ishinde qaıtys bolǵany týraly aqparat berilgen bolatyn. Qazaqstannyń Reseıdegi elshiligi ólgenderdiń denesin Qazaqstanǵa jetkizýdi uıymdastyrý úshin keńestik-quqyqtyq kómek kórsetip jatyr.
24 aqpan kúni Novoselkı selosyndaǵy qoıma ǵımarattary aýmaǵynda júk mashınasynyń ishinen úsh adamnyń óli denesi tabylǵan. Olardyń denesinde eshqandaı zábirleýshilik belgisi bolmaǵan. Aldyn ala boljam boıynsha olar gazdan ýlanyp qaıtys bolǵan. Mashınanyń kabınasynda gazben janatyn qurylǵy tabylǵan. О́limniń naqty sebebi saraptaýdan keıin anyq bolady.