Búginde Shyǵys Qazaqstanda 730 myńnan astam áıelder qaýymy bar eken. Bul - oblys turǵyndarynyń 50 paıyzy. Olardyń 60 paıyzy ekonomıkalyq jaǵynan belsendi turǵyndardyń sanatyna jatady. Áıelderdiń 40 paıyzy basshylyq qyzmet atqarýda. О́ńirdiń bilim berý, densaýlyq saqtaý, mádenıet salalarynda barlyǵy 80 myńdaı áıel eńbek etýde. 24 710 názik jandy pedagog jas urpaqty bilim nárimen sýsyndatýda.
Aımaqtyń densaýlyq saqtaý salasynda eńbek etip júrgen áıelderdiń kórsetkishi 90 paıyz bolsa, eki myńdaı áıel óńirdiń mádenıet salasynyń damýyna úles qosýda. Oblystaǵy «Altyn alqa» men «Kúmis alqaǵa» ıe bolǵan batyr analar sany jeti myń shamasynda eken. «Nemenege jetistiń bala batyr, qarııalar azaıyp bara jatyr» demekshi, ókinishke qaraı Uly Otan soǵysyna qatysqan ardager analarymyzdyń sany jyldan jylǵa azaıyp barady. Qazir óńirde 1941 jylǵy qandy qasapqa kýá bolǵan 29 ardager bar. Tyl ardageri atanǵan analardyń sany 19 myńǵa jetip jyǵylady eken.
Osyndaı derekterdi 8 naýryz merekesi qarsańynda О́skemende ótken saltanatty shara barysynda shyǵysqazaqstandyq áıelder qaýymyn meırammen quttyqtaǵan oblys ákiminiń orynbasary, áıelder isteri jáne otbasylyq-demografııalyq saıasat jónindegi oblystyq komıssııanyń tóraıymy Ásem Núsipovanyń aýzynan estidik.
«Áıelsiz ómir jylýsyz, áıelsiz ómir kóńilsiz. Suryqsyz tirshilikke ár beretin de, nár beretin de — áıel. Osynaý zalda búgin erekshe kóńil-kúı saltanat quryp tur. Biz qazir Shyǵystyń áıelderiniń qanshalyqty sulý, aqyldy da dana, meıirimdi ekendigine taǵy da bir kóz jetkizip otyrmyz. Júzderińizge kúlki úıirilip, bizdiń názik ıyǵymyzda úlken jaýapkershiliktiń baryn sezingenderińizdi qalaımyn. Shynynda da biz úshin shańyraq shattyǵy, otbasy men bala baqyty erekshe mańyzdy. Biraq biz óz kásibimizdi de adaldyqpen atqaryp kelemiz. Barshańyzdy shýaqty merekemen shyn júrekten quttyqtaımyn», - dedi oblys ákiminiń orynbasary.
Á.Núsipova saltanatty shara barysynda oblystyq tarıhı-ólketaný mýzeıiniń dırektory Svetlana Nurǵazıevaǵa, Semeıdegi «Aısha bıbi» ulttyq-mádenı ortalyǵynyń basshysy Aıman Boqbasarovaǵa, О́skemendegi «Balalar aýylynyń» ana-tárbıeshisi Gaýharııa Jumaǵalıevaǵa, Shyǵys Qazaqstan oblystyq prokýrorynyń aǵa kómekshisi Maǵırash Zaınovaǵa, polısııa maıory Gúlnara Qapyshevaǵa jáne Semeıdegi F.Dostoevskıı atyndaǵy mýzeı-úıiniń dırektory Tatıana Avtýshkoǵa Alǵys hat tabys etti. Osy marapatqa ıe bolǵan jandardyń arasynda ardager jýrnalıst Ǵafýra Sársenbaıqyzy, oblystyq «Dıdar» gazetiniń sholýshysy Aınagúl Eskenqyzy men «Altaı» telearnasynyń qyzmetkeri Mádına Káribaeva da bar.
Azamat QASYM,
«Egemen Qazaqstan»
О́SKEMEN
Sýretterdi túsirgen Vladımır Petýhov