Qazaqstanda jastarǵa arnalǵan Jastar1 telearnasy jumysyn bastaıdy. Bul týraly «Baıtaq Bolashaq» RQB prezıdenti Azamathan Ámirtaı Feısbýktegi paraqshasynda jazdy.
«Naýryz aıynda elimizde jańa telearnanyń tusaýy kesilmek - Jastar1. Onda qazirgi jastarǵa eń qajetti, eń paıdaly baǵdarlamalar kórsetilmek. Telearnanyń negizin qalaýshy - tájirıbeli medıamenedjer Ilııas Basharuly Ysqaqov. Kezinde «Qazaqstan» ulttyq arnasynyń eń sapaly jobalaryn iske qosqan aǵamyz. Endi bar kúshin atalǵan arnaǵa salmaq. «Baıtaq-Bolashaq» alıansy da telearnanyń ashylýyna óz úlesin qosty. Táýelsizdik kezindegi jeke azamattardyń úlesimen ashylyp otyrǵan birinshi qazaq telearnasy! Sonymen, jańa jylda jańa arnany kórińizder!», - dep jazdy ol.
Al Ilııas Ysqaqov Feısbýktegi paraqshasynda jańa telearna dırektorynyń shyǵarmashylyq jónindegi orynbasary Ǵalııa Shaýdyrbaeva, strategııalyq damý jáne kommersııa jónindegi orynbasary Gaýhar Imanqulova, kreatıvtik prodıýseri Alpamys Shárim taǵy da belgili, bilikti mamandar jańa arnanyń kontentin jasaýmen kúndiz-túni eńbek etip jatqanyn atap ótken.
«Osy kezge deıin jastarǵa arnalǵan telearnanyń bolmaǵany bizge oı saldy jáne osy baǵytta jumys jasaýymyzǵa sebep boldy. Basqa arnalar týraly baǵa berip jatýdy kórermenderdiń enshisine qaldyryp, bizdiń arnanyń shyn máninde jastar úshin, jastarmen birge bolýdy kózdeıtin, jastardyń talap-tilegin, muń-muqtajyn jetkize alatyn arna bolýy úshin barlyq mimkindikterimizdi iske qosyp jatyrmyz. Ártúrli baǵyttaǵy baǵdarlamalar, tok-shoý, kınokórsetilimder, telehıkaıalar jáne oıyn-saýyqtyq baǵdarlamalar efır kestesinen oryn alatyn bolady. «J1» telearnasy jastarmen birge!», - dep jazdy Ilııas Ysqaqov.