Memleket basshysy Nursultan Nazarbaevtyń «Prezıdenttiń bes áleýmettik bastamasy» Úndeýi barshamyzdy serpiltip tastady. Elbasy bul sátti qoǵamnyń áleýmettik birligin nyǵaıtýdyń kezeńi dep atap kórsetti. «Qazaqstan – bizdiń ortaq úıimiz» ıdeıasynyń jańa maǵynamen tolyǵa túsýi barlyǵymyzdyń azamattyq jáne áleýmettik jaýapkershiligimizdi arttyra túsedi.
Elbasy usynǵan bes áleýmettik bastama barlyq qoǵam músheleri úshin mańyzdy. Elimiz osy ýaqytqa deıin baspana alý múmkindikterin keńeıtý boıynsha kóptegen sharalar atqardy. Al «7 – 20 – 25» jańa baǵdarlamasy árbir otbasyna baspana alýdyń múmkindigin jasap, ásirese qarapaıym turǵyndardyń qoljetimdiligi artady. Elbasy usynǵan formýlanyń mazmuny qoǵam músheleri úshin túsinikti jáne ashyq.
Prezıdenttiń ekinshi bastamasynda jalaqysy tómen jumysshylardyń eńbekaqysyn kóbeıtý úshin olardyń salyq júktemesin azaıtý usynylady. Elbasy otandastarymyzdy qoldaý maqsatynda kelesi jyldyń 1 qańtarynan bastap jalaqysy tómen jumysshylardyń salyq júktemesin 10 esege azaıtyp, 1 prosent qana salyq salý jóninde baıandady. Bul ustanym 2 mıllıonnan astam adam jalaqysynyń jumys berýshige salmaq salmaı kóbeıý múmkindigin beredi.
Úshinshi bastama tikeleı elimizdiń bolashaǵy – óskeleń urpaq pen jastarǵa arnalǵan. Elimizdiń jastarǵa degen aıqyn kórinisi retinde jańa oqý jylynan bastap qosymsha 20 myń grant bólinýin aıtýymyzǵa bolady. Bul granttardyń 11 myńy tehnıkalyq mamandyqtar boıynsha bakalavrlyq bilim berýge tıesili. Bastama Qazaqstannyń Tórtinshi ónerkásiptik revolıýsııa jaǵdaıyndaǵy jańa ekonomıkada zor suranysqa ıe bolatyn ınjenerler, aqparattyq tehnologııa, robot-tehnıka, nanotehnologııa salasynyń mamandaryn daıarlaýǵa múmkindik beredi. Elbasy qazir joǵary oqý oryndary men kolledjderdiń stýdentterin jataqhanamen qamtamasyz etý máselesiniń ózekti ekendigin aıta otyryp, 2022 jyldyń sońyna deıin stýdentterge arnap keminde 75 myń oryndyq jańa jataqhana salýdy tapsyrdy. Atalmysh mindetti júzege asyrý úshin memleket pen jekemenshiktiń seriktestigi qaǵıdasyn paıdalanýdy usyndy.
Prezıdenttiń «Shaǵyn nesıe berýdi kóbeıtý» tórtinshi bastamasy jappaı kásipkerlikti damytýǵa serpin beretindigi anyq. Elimiz bul baǵytty damytý boıynsha baǵdarlamalar men qoldaý quraldaryn jetildirý ústinde. Bastamaǵa sáıkes osy jyly shaǵyn nesıelerdiń jalpy somasy artyp, qosymsha 20 mıllıard teńge bólinetin boldy.
«Eldi gazben qamtamasyz etýdi jalǵastyrý» atty Elbasynyń besinshi bastamasy eldiń mıllıondaǵan turǵyndaryn gazben qamtamasyz etýmen qatar, shaǵyn jáne orta bıznestiń jańa óndiristerin ashýǵa múmkindik beredi. Sonymen birge elimizdiń ekologııalyq ahýalyn jaqsartatyndyǵyna senimdimiz.
Memleket basshysy elimizdiń áleýmettik jańǵyrý jolynda jańa, aýqymdy qadam jasaýǵa daıyn ekendigin aıtty. Negizinen áleýmettik jańǵyrý barlyq azamattardyń muqtajdyqtary men múddelerin júzege asyrý barysyndaǵy qoǵamnyń damý qurylymyn jetildirý úderisi bolyp tabylady. Bul jańa men eskiniń, zamanaýı jáne dástúrli ustanymdar negizinde ózgeristerge ushyraıtyn qoǵamnyń ońtaıly jáne tıimdi qyzmetiniń kórinisi. Jańa baǵdarlamadaǵy barlyq basym baǵyttar, mindetter men maqsattar memlekettik organdar, turǵyndar, sarapshylar men ǵalymdar úshin transparentti qubylys. Sondyqtan Elbasynyń eldiń ıgiligi úshin usynǵan utymdy, optımıstik jobasy memleket tarıhyndaǵy mańyzdy baǵdarlama bolyp qala beretindigine senemiz.
Murat NASIMOV,
saıası ǵylymdar kandıdaty, qaýymdastyrylǵan professor, «Bolashaq» ǵylymı-zertteý ınstıtýtynyń dırektory
QYZYLORDA