Ońtústik Qazaqstan oblysynda memlekettik – jekemenshik áriptestik aıasynda stýdentter úıin salý boıynsha arnaıy konsepsııa talqyǵa salyndy.
О́ńirdegi joǵary jáne orta arnaýly oqý oryndarynyń basshylary bas qosqan jıynda «Qazaqstandyq memlekettik - jekemenshik áriptestik ortalyǵy» AQ basqarma tóraǵasynyń orynbasary Talǵat Mataev stýdentter úıiniń jobasy, onyń oryndalý barysy qaǵazǵa túsirilgenin, endi ony oılasyp birge pisirý qajettigin jetkizdi. Joba Elbasynyń «Prezıdenttiń bes áleýmettik bastamasyn» júzege asyrý aıasynda jasalyp otyr. Memleket basshysy halyqqa úndeýinde joǵary oqý oryndary men kolledjderdiń stýdentterin jataqhanamen qamtamasyz etý máselesi óte ózekti ekenin aıta kele, 2022 jyldyń sońyna deıin stýdentterge arnap keminde 75 myń oryndyq jańa jataqhana salýdy tapsyrǵan bolatyn.
Memlekettik – jekemenshik áriptestik tetigi aıasynda salynatyn stýdentter úıi halyqaralyq standarttarǵa jaýap beretin jataqhana bolady. Jobamen tanysyp shyqqan oqý oryn basshylary birqatar usynys pikirlerin ortaǵa salyp, sońǵy úlgide salynatyn jataqhanalarǵa tólenetin aqysyna alańdaýshylyq bildirdi. Iаǵnı, stýdenttiń qaltasy kótermeıtin bolsa, olar páter jaldap turýdy tańdaıdy. Konsepsııany bekiter kezde jıynda aıtylǵan osy syndy basqa da máseleler eskerilmek.
Jalpy oblysta memlekettik-jekemenshik áriptestik tetigi arqyly jalpy 59 jobany iske asyrý josparlanǵan. Onyń ishinde, quny 12,3 mlrd. teńgege 22 jobaǵa jeke áriptes anyqtalyp, kelisim-shart túzildi jáne 28,5 mlrd.teńgege memlekettik mindetteme alyndy.
Erkin DOSYMBAI,
Ońtústik Qazaqstan oblysy