Keshe Almatydaǵy «Bóbek» Ulttyq ǵylymı-praktıkalyq, bilim berý jáne saýyqtyrý ortalyǵynda Qazaqstan Respýblıkasynyń birinshi hanymy, «Bóbek» qaıyrymdylyq qorynyń prezıdenti Sara Nazarbaevanyń otandyq pedagogtarmen kezdesýi ótti.
BAQ ókilderine bergen bir suhbatynda «О́zin ózi taný» rýhanı-adamgershilik bilim berý baǵdarlamasynyń avtory Sara Nazarbaeva: «Árbir adam boıyndaǵy qabiletterdiń barlyǵyn paıdalana otyryp, tek týǵan eline ǵana emes, jer betindegi barsha adamzatqa paıdasy men shapaǵatyn tıgizýdi kózdeýge tıis. Qoǵamdaǵy rýhanı jáne adamgershilik qundylyqtardy bilim arqyly jandandyrǵan jón. Durys uıymdastyrylǵan bilim sondaı qundylyqtardan turatynyn da esten shyǵarmaǵan abzal. Tek bilim arqyly ǵana biz qoǵamdaǵy rýhanı baılyqty qalyptastyryp, ár adamnyń boıyndaǵy erekshe qasıetterdi tanyp, ıgi isterdi júzege asyramyz», – degen edi.
Almatyda ótken «Súıispenshilik sabaqtary» kópshiliktiń kóńilinen shyqqan sol bastamalardyń jalǵasy ispettes. Únemi ıgi isterdiń basy-qasynda júretin S.Nazarbaeva hanym ustazdar, muǵalimder, oqýshylar jáne túlektermen jıi-jıi kezdesip turýdy jaqsy bir dástúrge aınaldyrǵan. Bul joly elimizdiń birinshi hanymy «О́zin ózi taný» rýhanı-adamgershilik bilim berý baǵdarlamasy boıynsha biliktiligin arttyrý maqsatynda respýblıkamyzdyń ár óńirinen «Bóbek» ortalyǵyna arnaıy kelgen muǵalimdermen júzdesti.
Baǵdarlama avtory álemdegi rýhanııat, adamgershilik qundylyqtar men ımandylyq, adam men qoǵam, tabıǵattyń tylsym kúshi jáne basqa da ózekti máseleler tóńireginde tartymdy áńimelerdiń tıegin aǵytty. Balanyń jeke tulǵa retinde qalyptasýyndaǵy ata-ana men muǵalimderdiń atqaratyn róline aıryqsha toqtaldy.
Elimizdiń ár óńirinen jınalǵan ustazdar qaýymy óz kezeginde Sara Alpysqyzyna san alýan saýaldar joldap, birqatar ózekti máseleler boıynsha oılaryn ortaǵa salyp, pikir bólisti.
Esterińizge sala keteıik, Sara Nazarbaeva hanymnyń bastamasymen dúnıege kelgen «О́zin ózi taný» baǵdarlamasynyń basty maqsaty – adamnyń ishki áleýetin ashý arqyly onyń rýhanı qundylyqtarynyń qalyptasýyna kómektesý, joǵary adamgershilik qasıetterin tárbıeleý, ómirlik mańyzy zor iskerlikteri men daǵdylaryn damytý.
Al «О́zin ózi taný» páni 2010 jyldyń 1 qyrkúıeginen bastap Qazaqstan Respýblıkasynyń úzdiksiz bilim berý júıesine engizilgen bolatyn.
Ǵalym SÚLEIMEN,
«Egemen Qazaqstan»