BUU Qaýipsizdik keńesindegi Qazaqstannyń turaqty ókili Qaırat Omarov keńestiń AQSh, Fransııa jáne Ulybrıtanııanyń Sırııa nysandaryna zymyranmen soqqy jasaýyna oraı shuǵyl shaqyrylǵan otyrysynda málimdeme jasap, jaǵdaıdy odan ary ýshyqtyrmaýǵa shaqyrdy.
«Qazaqstan Sırııadaǵy ahýaldyń ýshyǵa túsýine baılanysty óziniń barynsha alańdaýshylyq tanytyp otyrǵandyǵyn bildiredi. Biz barlyq tarapty munan ary ýshyǵa túsýge jol bermeýge jáne BUU jarǵysy men Qaýipsizdik keńesiniń qararlary negizinde azap shekken Sırııaǵa senim, beıbitshlik jáne qaýipsizdikti qaıtarý úshin sharalar qabyldaýǵa shaqyramyz. Osy zalda shıelenisterdiń arta túskendigin kórgen saıyn, biz BUU jarǵylaryna jáne halyqaralyq quqyqqa sáıkes jaýapkershilikpen áreket etýge shaqyramyz», dedi Qaırat Omarov.
Ol Qazaqstan basqa elderdi de halyqaralyq quqyq pen zańdy qatań saqtaýǵa shaqyratynyn aıtty. «Degenmen, ókinishke oraı keshe biz basqa úlgini kórdik. Qandaı ıgi isti jeleý etip shara qabyldasa da olar áskerı kúsh qoldanýdy aqtaı almaıdy. Ozbyrlyqqa zorlyqpen jaýap berý esh ýaqytta da beıbitshilik pen turaqtylyqqa ákelmeıdi. Qazaqstan «áskerı is-qımyl - Qaýipsizdik keńesi maquldaǵan jaǵdaıda ǵana qoldanylýy múmkin sońǵy shara» degen ustanymdy qoldaıdy jáne osylaı bolyp qala beredi», dep atap ótti Qazaqstannyń turaqty ókili.
Qaırat Omarov Sırııa máselesin barynsha baıyppen talqylaıtyn ýaqyttyń jetkenin de basa aıtty. «Biz AQSh pen Reseı Federasııasyn olardyń Sırııany qoldaý jónindegi halyqaralyq toptyń teń tóraǵasy bolyp sanalatyndyǵyn jáne basqa taraptarǵa da yqpal etý múmkinshilikteriniń bar ekendigin eskere otyryp, Sırııadaǵy janjaldy saıası retteýge qol jetkizý úshin belsendi áreket etýge shaqyramyz. BUU taraptar ózara daýlaryn retteý úshin kelissózder júrgizýi tıis. Keshe ǵana BUU Bas hatshysy Antonıo Gýtterısh ókinishke oraı, «qyrǵı qabaq soǵystyń» qaıta oralyp kele jatqanyn eske salǵan edi. Qazaqstan taraptardy BUU jarǵysy men halyqaralyq quqyqtyq saqtaýǵa shaqyrady. Biz sonymen qatar, janjaldy tek qana beıbit jolmen sheshýge shaqyramyz»,dedi ol.