Almatyda «Biz Almaty» jobasynyń «Almatynyń jalpy bas josparyn ázirleý» taqyrybyndaǵy tórtinshi forýmy ótti. Forýmdy Brıtandyq Keńes, «Almaty qalasyn damytý ortalyǵy» AQ, Qazaqstan-Brıtan tehnıkalyq ýnıversıteti men Almaty qalasynyń ákimdigi Eýropalyq Odaqtyń 430 myń eýro mólsherindegi qarjylyq qoldaýymen iske asyrylatyn «Biz Almaty» jobasynyń sheńberinde uıymdastyrdy.
Forým Almatynyń Bas josparynyń, ıaǵnı qalalyq ortany damytýdy qamtıtyn qalanyń jańa qurylymdyq-fýnksııalyq úlgisiniń sheńberinde qalany damytýdyń kókeıkesti ortaq kórinisin qalyptastyrý úshin memlekettik qurylymdar men qalalyqtardyń suhbat alańy retinde ótkizildi.
Osy is-shara barysynda «Biz Almaty» jobalar baıqaýynyń jeńimpazdary jarııalandy. Konkýrs 2017 jylǵy qarashada Almaty qalasyn ornyqty damytýǵa arnalǵan áleýmettik jáne ekonomıkalyq jobalarǵa bastamashy bolýǵa jáne iske asyrýǵa qala turǵyndaryn tartý maqsatynda jarııalanǵan bolatyn. Baıqaýǵa 130-den astam ótinim tústi. Jeńimpazdardyń árqaısysy óz jobalaryn iske asyrý úshin Eýropalyq Odaqtan 5 myń eýroǵa deıin aldy.
Eýropalyq Odaqtyń Qazaqstandaǵy О́kildiginiń Basshysy Traıan Hrıstea myrza jeńimpazdarǵa marapatty tapsyra otyryp, «Eýropalyq Odaq qoǵamdyq uıymdardyń da, sondaı-aq jergilikti bıliktiń de jumysynyń mańyzdylyǵyn árqashan baǵalap, olarǵa kókeıge qonatyn qoldaý kórsetip kele jatqany atady. Munyń sebebi – damý boıynsha ortalyqtandyrylǵan ákimshilik baǵdarlamalary men saıasaty turaqty damýdyń barlyq kúrdeli máselelerin óz betinshe sheshe almaıdy. Sondaı-aq qoǵamdyq uıymdar men jergilikti bılik organdarynyń ózderi de damý úderisinde mańyzdy ról atqarady. О́ıtkeni olar kez kelgen demokratııanyń eleýli ári ajyramas bóligi bolyp tabylady.
О́z kezeginde «Biz Almaty» jobasy bes ınstıtýsıonaldyq reformany iske asyrý jónindegi «100 naqty qadam» Ulttyq josparymen tyǵyz baılanysty. Sebebi 97 qadam «ózin-ózi retteý men jergilikti ózin-ózi basqarýdy damytý arqyly azamattardyń sheshimder qabyldaý úderisine qatysý múmkindigin keńeıtýdi» kózdeıdi.
Forýmǵa qatysýshylar Bas jospardy jaqsartý boıynsha ıdeıalaryn bólisti jáne Almatyny halyqtyń túrli toptary, sonyń ishinde, arbadaǵy kishkentaı balalary bar analar, kemtar jandar, velosıpedshiler, qart adamdar men stýdentter úshin qalaı yńǵaıly ári qolaıly etýge bolatyny jóninde usynystaryn berdi. Jergilikti bılik organdarynyń ókilderi ázirlenip jatqan Bas jospardyń tujyrymynyń negizgi qyrlary týraly jáne osy baǵyttaǵy keleshek jumys josparlary týraly baıandady.
Aınash ESALI,
«Egemen Qazaqstan».
ALMATY