M.Qozybaev atyndaǵy Soltústik Qazaqstan memlekettik ýnıversıtetiniń stýdentteri Arktıka ekspedısııasyna shaqyrtý aldy.
Reseıdiń Iаmal-Nenes avtonomııalyq okrýginen óńirge kelgen delegasııa músheleri eńseli oqý ornynda kezdesý ótkizip, ekologııalyq ekspedısııanyń maqsat-mindetterimen tanystyrdy. Osydan 5 jyl buryn bastaý alǵan mańyzdy sharaǵa Reseı, Aýstrııa, Bolgarııa, Ýkraına, Qytaı jáne Kýba elderinen 160-tan astam ókil qatysypty. Eriktiler Arktıkanyń soltústik bóligin aýyr metall qaldyqtarynan tazartyp, ǵylymı jumystarmen shuǵyldanypty.
Arktıka Eýrazııa jáne Soltústik Amerıka qurlyqtarynyń soltústik shetin, Soltústik muzdy muhıtty araldarymen qosa alǵanda túgel qamtıtyn Jer sharynyń soltústik polıýs aımaǵy sanalady. Aýdany – 27 mln sharshy shaqyrym, onyń 15 mln sharshy shaqyrymyn muhıt sýy quraıdy. Onyń quramyna Reseıdiń Mýrmansk, Arhangelsk, Túmen oblystary, Krasnoıarsk ólkesi, Saha Respýblıkasy, Kanadanyń, AQSh-tyń, Danııanyń, Norvegııanyń birqatar araldary kiredi.
– Soltústik Qazaqstan men Iаmal-Nenes óńirleriniń arasynda uqsastyqtar az emes. Sizder sııaqty biz de soltústik aımaqta turamyz. Eki tarap arasyndaǵy dostyq qarym-qatynas odan ári bekı túserine senimdimin,– dedi jıynda Iаmal-Nenes avtonomııalyq okrýgi halyqaralyq syrtqy baılanys departamenti dırektorynyń birinshi orynbasary Sergeı Ýramaev.
Ekologııalyq ekspedısııa 15 kúnge jalǵasady. Úmitkerler ekologııa jáne bıologııa mamandyqtary boıynsha oqyp júrgen stýdentterden iriktelip alynady. Olar ǵalymdardan, bıologterden jasaqtalǵan ekspedısııa quramynda Karsk teńiziniń jaǵalaýynda ornalasqan, búginde eshkim turmaıtyn Vılkıskıı aralynyń tylsym syrlarymen tanysatyn bolady. Kezinde munda iri óndiris oryndary, áskerı bólimder, meteostansalar bolǵan eken. Osynda aýmaqtyń ekologııalyq jaǵdaıyn retteýmen qatar ǵylymı zertteýler júrgizý–ekspedısııanyń basty maqsaty .
«Arktıka eriktileri» jobasynyń jetekshisi Evgenıı Rojkovskııdiń sózine qaraǵanda 5 jyl boıy Beloe araly qoqystan tazartylypty. Osylaısha araldyń ekologııalyq pasporty barlyq talaptarǵa sáıkestendirilipti. Endigi kezek – Vılkıskıı araly. Onda tek tikushaq qana qatynaıtyn kórinedi. Uıymdastyrýshylar ekspedısııa múshelerin jatyn orynmen, azyq-túlikpen qamtamasyz etedi.
Ekologııalyq ekspedısııa sapary shilde aıynda bastalady.
О́mir ESQALI,
«Egemen Qazaqstan»
Soltústik Qazaqstan oblysy