Elbasy qabyldady

Keshe Memleket basshysy Nursultan Nazarbaev Qazaqstan Respýblıkasy Ulttyq bankiniń tóraǵasy Grıgorıı Marchenko­ny qabyldady, dep habarlady Qazaqstan Respýblıkasy Pre­zıdentiniń baspasóz qyzmeti. G.Marchenko Memleket basshysyn elimizdiń qarjy salasynyń aǵymdaǵy jaǵdaıy, atap aıtqanda, valıýta rynogyndaǵy jaǵdaı týraly habardar etti. – Valıýta rynogyndaǵy jaǵdaı óte qalypty. Aǵymdaǵy jyldyń qarasha aıynda biz bırjadan 100 mln. AQSh dollaryn satyp aldyq. Sondyqtan búgingi kúni Ulttyq qordyń aktıvi 43,5 mlrd. AQSh dollaryn, Ulttyq banktiń altyn-valıýta qory 32,5 mlrd. AQSh dollaryn quraıdy. Elimizdiń jıyntyq altyn-valıýta aktıvi 76 mlrd. AQSh dollaryna jetip otyr. 2012 jyldyń 1 qańtarynan bastap Qazaqstanda óndiriletin barlyq altyn Ulttyq bank arqyly satyp alynady. Tólem balansy boıynsha jaǵdaı óte jaqsy. Úshinshi toqsanǵa arnalǵan tólem balansynyń saldosy jaǵymdy bolyp tabylady. Men sondaı-aq Memleket basshysyna bank salasyndaǵy jaǵdaı týraly baıandadym. Aǵymdaǵy jyldyń mamyr aıynan beri oń úrdis baıqalýda. Nesıeleý kólemi arta bastady. Aǵymdaǵy jyldyń 10 aıynda nesıeleý 11 paıyzǵa artty. Bul – óte oń jaǵymdy kezeń, – dedi Ulttyq bank tóraǵasy.

*  *  *

Memleket basshysy Nursultan Nazarbaev Qazaqstan Jazýshylar odaǵynyń tóraǵasy, kórnekti qoǵam qaıratkeri, Qazaqstan Respýblıkasy Memlekettik syılyǵynyń laýreaty Nurlan Orazalındi qabyldady, dep habarlady Qazaqstan Respýblıkasy Prezıdentiniń baspasóz qyzmeti. Kezdesý barysynda qoǵamdyq damýdyń, qazirgi zamanǵy ádebı úderisterdiń ózekti máseleleri jáne Qazaqstandy jańǵyrtýdaǵy zııaly qaýymnyń róli talqylandy. N.Orazalın Qazaqstan Jazýshylar odaǵynyń qyzmeti týraly aıtyp berdi. Áńgimelesý barysynda Memleket basshysy mádenıet, ulttyq ádebıet pen ónerdi damytý máselelerine erekshe nazar aýdardy. – Prezıdent árbir jazýshyny jáne mıllıondaǵan qazaqstandyq oqyrmandar aýdıtorııasyn bizdiń basty ıgiligimiz – Táýelsiz Qazaqstandy qasterlep saqtaýǵa shaqyrdy. Ulttyq ádebıet bizdiń qoǵamnyń bıik rýhanı adamgershilik qundylyqtaryn kórkem sózben jetkize bilip, osy qoǵamdyq mindetti iske asyra otyryp, damýy kerek, – dedi N.Orazalın.