Túrkistan oblysynda ınvestorlardyń quqyǵyn qorǵaý maqsatynda «prokýrorlyq súzgi» júıesi arqyly byltyr 41 zańsyz ákimshilik isti kelisýden bas tartylyp, 12 ınvestorǵa qatysty negizsiz tekserýler toqtatyldy. Sońǵy eki jylda memlekettik organdardyń 300-ge jýyq sheshimi zerdelenip, nátıjesinde 62 ákimshilik isti qozǵaýdan jáne 21 tekserýdi taǵaıyndaýdan bas tartylǵan, dep jazady Egemen.kz.
Bul derekter oblys prokýratýrasynyń bastamasymen ınvestorlardyń quqyqtaryn qorǵaý jáne ınvestısııalyq jobalardy súıemeldeý máselelerine arnalǵan «Investısııalyq klımat-damýdyń basty quraly» taqyrybynda ótken dóńgelek ústelde keltirildi.
«Búginde Túrkistan oblysy ınvestısııa tartý boıynsha elimizdiń jetekshi óńirleriniń biri sanalady. Árbir ınvestısııalyq joba ákimdik tarapynan súıemeldenip, ınvestorlarǵa «bir tereze» qaǵıdaty negizinde jedel qyzmet kórsetilip otyr. Nátıjesinde 2025 jyly óńir ekonomıkasyna 1,7 trln teńge ınvestısııa tartylyp, ósim 121,6%-dy qurady. Onyń ishinde 1,4 trln teńge – jeke ınvestısııalar úlesinde. 2026 jyly 444 mlrd teńgege 66 jobany iske asyrý arqyly 7 myńǵa jýyq jańa jumys ornyn ashý josparlanǵan. Bizdiń mindetimiz – qaýipsiz ári ashyq ınvestısııalyq ortany qalyptastyrý», dedi oblys ákimi Nuralhan Kósherov.
Sondaı-aq 2026 jylǵa tikeleı sheteldik ınvestısııalar tartý jospary 499 mln dollar kóleminde bekitilgen. Oblys ákimdigi men quqyq qorǵaý organdary ınvestorlardyń ózekti máselelerin jedel sheshý maqsatynda turaqty ınvestısııalyq shtab otyrystaryn ótkizip, jeke kezdesýler uıymdastyryp keledi.
Eske sala keteıik, Úkimettiń keńeıtilgen otyrysynda Memleket basshysy bizge jańa ári sapaly ınvestısııa tartýǵa arnalǵan birtutas strategııa qajet ekenin aıtty.