Oral qalasyndaǵy orta mektepterde «Rýhanı jańǵyrý – tabysty el bolýdyń kepili» atty ashyq esik kúnderi ótip jatyr. Osyǵan oraı №47 orta mektepte «Týǵan mektepke taǵzym», «Mektepke kitap syılaıyq» aksııalary nátıjesinde mektep aýlasynda jańa alleıa paıda bolyp, oqýshylar kitaphanasyna 500-ge jýyq kitap tartý etildi.
– Elbasynyń «Rýhanı jańǵyrý» baǵdarlamasy aıasynda Oral qalalyq bilim berý bólimi arnaıy ereje bekitip, sol ereje boıynsha barlyq qala mektepterinde ashyq esik kúnderi ótkizilip jatyr. Taǵy bir oqý jylyn qorytyndylar qarsańda bilim ordalarynyń jumys nátıjesine, jas urpaqqa qandaı bilim berip jatqanyna kýá bolyp kelemiz. Búgin biz jumysymen tanysqan №47 mektepte de jaqsy bastamalar kóp eken. Alda turǵan bilim synaǵy – memlekettik attestasııadan túlekter óte jaqsy ótsin! – deıdi Oral qalalyq bilim bóliminiń ókili Jazıra Rysqazıeva.
№47 mektep – 2015 jyly qyrkúıekte ashylǵan jańa bilim ordasy. 1200 oqýshyǵa arnalǵan ǵımaratta qazirdiń ózinde 2300-deı bala oqıdy. Mektepti 2016 jyly – 45 túlek, 2017 jyly 46 túlek bitirgen. Al bıyl 69 oqýshy bitirgeli otyr.
– Osy túlekterdiń ózderi jáne ata-analary bizge usynys aıtyp, mektep aýlasyna tal-terek egý úshin oryn surady. Bul keremet bastama ǵoı. Buıyrsa, mektep aýlasynda túlekter alleıasyn jasap, saıabaqqa aınaldyrǵymyz keledi. Mine bıyl bitirgeli otyrǵan úsh synyp oqýshylary «Týǵan mektepke taǵzym» aksııasyn bastap, 16 túp aq qaıyń kóshetin otyrǵyzdy, – deıdi mektep dırektory Natalıa Erǵojıeva.
Túlekter alleıasynyń alǵashqy kóshetterin ekken onbirinshisynyptyqtar atynan Arýjan Ibatolla osy mekteptiń 4 «á» synybynda oqıtyn Amaner Amandyqqa «jas kóshetterge sý quıyp, qamqor bolyp júrińizder» degen ótinish-amanatyn aıtty.
Bilim ordasynda oqýshylardyń ata-anasy yqylastana qoldap ketken tamasha aksııanyń biri – «Mektepke kitap syılaıyq» sharasy bolypty. Shyny kerek, jańa mektep bolǵandyqtan, mundaǵy kitaphanada oqýshylarǵa usynatyn ádebı-tanymdyq kitaptar tapshy bolatyn. О́ıtkeni búginde mektep kitaphanalaryna oqýlyqtan ózge kitaptar alýǵa qarjy bólinbeıdi.
– Mektebimizde 90 komplekt-synyp bolsa, olardyń bári de osy aksııaǵa belsene qatysty. Nátıjesinde kitaphanamyz bir kúnde 486 kitappen tolyqty! Bulardyń ishinde ádebı kitaptar da, balalar ádebıeti de, tanymdyq basylymdar da bar, – deıdi mektep kitaphanasynyń meńgerýshisi Kámshat Bazarbaeva.
Ashyq esik kúni aıasynda osy mekteptiń oqýshysy Rústem Saıranovtyń tuńǵysh óleńder jınaǵynyń tusaýy kesildi.
Qazbek QUTTYMURATULY, «Egemen Qazaqstan»
ORAL
Sýretti túsirgen avtor