Memleket basshysy Nursultan Nazarbaev táý eter Táýelsizdigimizdi alǵan kúnnen bastap jas urpaqqa bilim berý, tárbıeli etip ósirý máselesin birinshi kezekke shyǵaryp kele jatqany qalyń jurtqa málim. Jyl saıynǵy Joldaýlarynda da bul ıgi is sala-salaǵa bólinip, tııanaqty jumystardy tyńǵylyqty atqarý jaıy da alǵa tartylyp, ásirese, jaratylystaný pánderin oqytý týraly baǵyt-baǵdar berip keledi. Osy qamqorlyqty qaltqysyz oryndaý maqsatynda Bilim jáne ǵylym mınıstrliginiń «Daryn» respýblıkalyq ǵylymı-praktıkalyq ortalyǵy matematıka, fızıka, bıologııa jáne hımııa pánderinen prezıdenttik olımpıada ótkizýdi dástúrge aınaldyryp otyr.
Bıyl da úlgi bolar úrdis jalǵasyn taýyp, keshe elordada aıtýly olımpıada óz jumysyn bastady. Bul jolǵy bilim saıysy Táýelsizdigimizdiń 20 jyldyǵyna arnalyp otyrǵanyn aıta ketsek deımiz. Elordadaǵy «Rixos President Hotel Astana» qonaqúıiniń májilis zalynda ashylǵan saltanatqa elimizdiń barlyq aımaǵynan kelgen 160-qa taıaý 11-synyp oqýshylary qatysty. Olımpıadanyń basty maqsaty: jaratylystaný-matematıkalyq baǵytta daryndy oqýshylardy anyqtap, olarǵa qoldaý kórsetý, bilim-biligi myqty talantty jastarǵa jaǵdaı jasaı otyryp, patrıottyq rýhyn bıiktetip, eldik turǵyda tárbıe berý.
Prezıdenttik olımpıadanyń bas demeýshisi bolyp otyrǵan «Ekson Mobıl Qazaqstan Ink.» kompanııasy ekenin, bul kompanııanyń árkez urpaq tárbıesine, olardyń bilim alýyna qarjylaı kómek kórsetip, onyń ishinde, jaratylystaný pánderine árkez iltıpat tanytatynyn atap ótkenimiz lázim.
Olımpıadaǵa qatysqan oqýshylardyń bilimin baǵalaıtyn qazylar alqasynyń tóraǵasy, akademık, Memlekettik syılyqtyń laýreaty Muhtarbaı О́telbaevtyń aıtýyna qaraǵanda, júzden júırik jeńimpazdar mektep bitirgennen keıin ózderi qalaǵan joǵary oqý oryndaryna túse alady eken. Ol jarys úsh kezeńde, ıaǵnı teorııalyq, eksperımenttik jáne Brıtan keńesiniń aǵylshyn tilinen test tapsyrmalaryn oryndaý boıynsha ótetinin de alǵa tartty.
Súleımen MÁMET.