Táýelsizdik tolǵaýy

Redaksııanyń janynan qurylǵan «Egemen» baspasy sońǵy eki jyldyń oraıynda birer kitap shyǵaryp úlgerdi. Táýelsizdik toıy qarsańynda ol kitaptar serııasy «Táýelsizdik» atty kólemdi jınaqpen tolyǵa tústi. Búgin, Astanadaǵy akademııalyq kitaphanada baspahana boıaýy da keýip úlgermegen tyń týyndynyń tusaýkeseri ótedi. Kitapqa «Egemen Qazaqstan» respýblıkalyq gazeti» aksıonerlik qoǵamynyń prezıdenti Saýytbek ABDRAHMANOV jazǵan alǵysózdi oqyrman nazaryna usynyp  otyrmyz. «Egemen» baspasynyń kezekti kitaby  «Táýelsizdik» ata­lady. Buǵan deıin, 2010 jyly Prezıdent N.­Á.Na­zar­baev jaı­yndaǵy jarııala­nym­dardan «El­basy» jına­ǵyn, odan keıin, 2011 jyldyń basynda elimiz­diń Eýropa tórine kóterilip, kári qur­lyq­qa tóbebılik etken mereı bıigi jónindegi maqala, reportaj, suhbattardan «Saltanat» ki­tabyn qurastyrǵan bo­latyn­byz. Bul jınaqqa ótken jı­yrma jylda bas basylym betinde Táýelsizdiktiń  qadir-qa­sıeti, táýekelge toly ta­ǵylymdy tarıhy, jeńister men jemisterge toly jasam­paz­dyq joly jaıynda jazy­lyp, ja­ryq kórgen materıaldar top­tastyryldy. Osy ar­qyly el gazeti qazaq tilindegi saıası jýr­nalıstıkanyń tuń­ǵysh trı­lo­gııasyn oqyrman nazaryna usy­nyp otyr dep te aıta alamyz. Táýelsizdik... Myna dúnıe­de 2500-den astam halyq bar eken. Sonyń eki júzge jýyǵy ǵana óziniń memlekettiligine ıe eken. Sany jaǵynan qazaq­ty san orap ketetin ulttar­dyń ara­syn­da da óz eli ózine óleń tóse­gi bolmaı, týǵan jerinen bir ja­pyraq týyn tigetin ala­qan­daı tóbe tappaı júrgenderi jeterlik. Tipti týǵan jerge týyn tikken el­derdiń bárin birdeı tolyq maǵynasynda táýelsiz dep tanı almaıtynymyz taǵy bar. Bul bıikke el táýelsizdikti jarııalaýmen, gımndi, gerbti, týdy belgileýmen, tipti Birikken Ulttar Uıymynyń múshe­ligine ótýmen de birden jete qalmaıdy. Táýelsizdik uǵy­my­nyń aıasy keń. Álemdik qaýym­dastyq moıyndaǵan óz aýmaǵy bolýy da, sol aýmaqty basqara­tyn memlekettik bı­lik­tiń bo­lýy da bul úshin az­dyq etedi.  Táýelsizdik eń al­dymen mem­lekettiń óz saıasa­tyn óz erkimen júrgizýge qabi­lettiligin bildiredi. Kúnińdi zorǵa kórip, kórshilerińnen kómek surap, barar jerińe bara almaı, aıtar sózińdi aıta almaı, jan-jaǵyńa jaltaqtap júrseń qansha jerden atyń táýelsiz bolsa da zatyń táýeldi elsiń degen sóz. Shúkirshilik, artta qalǵan jıyrma jyldyń alǵashqy be­lesterinen-aq Qazaqstan Res­pýblıkasy tolyq táýelsiz­dikke jetýdiń jolyna tústi,  nebir taıǵaq keshýlerden aman-­esen ótip, azattyqtyń alǵashqy ári azap, ári ǵajap asýlarynan aby­roımen asty, aınalasy on­shaqty jyldyń júzinde egemen el retinde da­mýdyń dańǵylyna qaraı qa­dam basty. Odan keıingi on­jyldyqta qazir búkil álem «Qazaqstan joly» dep at qoı­yp, aıdar taqqan shyn máninde  fenomen qubylysty dúnıege ákeldi. Búginde bizdiń elimiz eko­nomıkadaǵy ishki jalpy ónim­niń ósý qarqyny jóninen álem­degi eń aldyńǵy kórset­kish­terdiń birine qol jetkizip otyr. Bir sóılemmen aıtyla salǵan osy jaıdyń astaryna kóz jibersek, tarıh saǵatynyń tili syrt ete qalǵandaı qysqa kezeńde keshegi keńestik ımpe­rııa­nyń shet aımaǵy, shıki­zat­tyq shy­laýy retinde  kelgen res­pýblıkadan ekonomıkasy qýat­­ty, saıasaty turaqty, súıegi myǵym memleketke, sózdiń to­lyq maǵynasyndaǵy eńseli elge, el bolǵanda da alys ta, jaqyn da moıyndaıtyn, Batys ta, Shyǵys ta birdeı syı­laıtyn elge, kóp dindi, kóp tildi, biraq bir dildi elge aı­na­lý­dyń qandaılyq qıyn­dyǵyn sergek sana sezinbeı qoımaıdy. Osynyń bárine eń aldymen tabıǵatynan keń jaratylǵan, mol pishilgen  hal­­qymyzdyń, sol halyqqa  dana basshylyq jasaı bilgen Elbasymyzdyń – halqy­myz­dyń baǵyna týǵan perzent, elimizdiń Tuńǵysh Prezıdenti Nursultan Nazarbaev­tyń ar­qasynda qol jetip otyr­ǵany shyǵar kúndeı shyndyq. Kitapta basy qosylǵan dú­nıeler Qazaqstannyń osy jı­yrma jyldaǵy júrip ót­ken joly atqan oqtaı túzý, tó­sel­gen taqtaıdaı tegis bol­ma­ǵa­nyn, jas memlekettiń al­dynan talaı-talaı synaqtar tosyl­ǵanyn, olardy eńserý eldiń eli­niń, erdiń eriniń qo­ly­nan keletinin kórsetedi. Qazaq eliniń de, eldi bas­qarǵan erdiń de qo­lynan keldi sol sharýa. Osy jıyrma jyl­dyń ishinde dala­myz da ózger­di, qalamyz da óz­gerdi. Olaı bolatyny – bárinen buryn bizdiń sanamyz ózgerdi. Ata-babalarymyz ańsap, armandap ótken azattyqqa   arpa­lysqa toly jasampaz jumys qana  aparatynyn, táýelsizdik­ke táýe­keli turatyndardyń ǵana  qoly jetetinin aıqyn uǵyn­­­­ǵan  bostan sana ol. Táýel­sizdiktiń basqa bir qonsa máń­gilikke shegelenip qalmaı­tynyn, baıandy bostandyq ba­qyttyń baǵasyn bilgenderdiń ǵana qolynda turatynyn da biledi bizdiń halqymyz. Bar adamzat bir bazarda báseke­lesip, baryn salyp, baǵyn synap jatqan myna jahan­daný­dyń jantalasty jaǵdaı­ynda ult retinde upaıyńdy joǵalt­paý, halyq qalpyńda qadirińdi ketirmeý,  memleket kúıinde my­ǵym turý barǵan saıyn qıyndaı túsetinin de biledi bizdiń halqymyz. Bul kitap shyn máninde Táýelsizdik tolǵaýy. Ony oqı otyryp, siz ben biz ata-babalar amanatyn aqtaǵan urpaq ekenimizge maqtanamyz, siz ben bizdiń myna jerdiń betine kelgen kezimiz halqymyzdyń tarıhyndaǵy eń bir ǵajaıyp tusqa – azattyq alǵan, táýel­siz memleket qur­ǵan tusqa tap bolǵanyna, bizdiń mańdaıy­myzǵa osy eldiń kirpishin qalaý baqyty buıyr­ǵa­nyna shúkirshilik etemiz, ony oqı otyryp, keler urpaq ózde­rine Elbasy bastap, eli qostap quryp bergen Qazaqstannyń qadir-qasıetin tanı túsedi, táýel­sizdik týyn jelbiretip ustaýdyń jaýapkershiligin sezine túsedi. El gazeti «Egemen Qazaq­stan» barshańyzǵa Táýelsiz­digimizdiń uly toıy tusynda osy kitapty tartý etedi, ar­daqty aǵaıyn. Torqaly toıymyz qutty bolsyn!