Batys Qazaqstan oblystyq «Oral óńiri» jáne «Prıýrale» gazetteri byltyr shyǵa bastaǵanyna 100 jyl tolǵan mereıtoıyn atap ótken edi. Osy dataǵa oraı uıymdastyrylǵan balalar shyǵarmashylyǵy baıqaýy bıylǵy oqý jylynyń sońynda qorytyndylanyp, kishkentaı jeńimpazdar tanymal qalamgerlerdiń qolynan syı-sııapat aldy.
Aıta ketý kerek, «Oral óńiri» gazeti kishkentaı oqyrmandarymen júıeli baılanys ornatqan. Basylymda balalar shyǵarmashylyǵyna arnalǵan «Aınalaıyn» beti turaqty jarııalanady. Al kishkentaı qalamgerlerdiń shyǵarmashylyǵyna arnalǵan baıqaý 2002 jyldan beri ótip keledi. «Mektepte oqyp júrgen kezinde osy baıqaýǵa qatysyp, júldeger bolǵan birneshe jas búginde jýrnalıstıka salasynda qyzmet etip, áriptes bolyp júrmiz» deıdi «Oral óńiri» gazetiniń bas redaktory Baýyrjan Ǵubaıdýllın.
Bul jolǵy baıqaý 1-6 synyp aralyǵyndaǵy oqýshylar arasynda uıymdastyrylypty. Jeńimpaz atanǵan kip-kishkentaı qalamgerler «Jaıyq Press» ǵımaratyna arnaıy shaqyrylyp, syılyqtary saltanatty jaǵdaıda tapsyryldy.
Osy sharaǵa arnaıy kelgen aqyn, Qazaqstan Respýblıkasynyń eńbek sińirgen qaıratkeri, «Qurmet» ordeniniń ıegeri Aqushtap Baqtygereeva jas qalamgerlerdi quttyqtap, aq tilegin aıtty:
– Biz sózdi uǵyp, shyǵarma túsinetin baldyrǵandarǵa zárýmiz ǵoı. Ádebıetke beıjaı qaramaı, kitap-gazet oqýǵa yntaly baldyrǵandardy kórgenime qýanyp otyrmyn. Men de sender sekildi aýylda týyp-óstim. Alǵashqy óleńderim de aýylǵa arnaldy. Mine, arý Almatyny, ásem Astanany tastap, Aq Jaıyqqa qaıtyp oralǵanym da osy týǵan jerge degen mahabbattyń arqasy, – dedi Aqushtap Baqtygereeva.
Sonymen «Oral óńiri» gazetiniń ǵasyrlyq toıyna arnalǵan balalar shyǵarmashylyǵy baıqaýynyń júldesin óńirdiń Zelenov aýdanyndaǵy О́rken mektep balabaqsha kesheni oqýshysy Raýken Zaıdýllın, Shyńǵyrlaý aýdany Aqtaý aýyly mektebi oqýshylary Raıhan Tasemen men Sherhan Qaıdarǵalı, Bórli aýdany Grıgorev mektep-balabaqsha kesheniniń 4-synyp oqýshylary Gúlaıhan Ǵanıeva, Erkebulan Sharıbdanov, Aıkórkem Qanapııa jeńip aldy. Olardyń árqaısysyna arnaıy dıplom, aqshalaı syılyq, sporttyq buıymdar jáne kitaptar toptamasy syıǵa berildi.
Qazbek QUTTYMURATULY, «Egemen Qazaqstan»
Batys Qazaqstan oblysy