Ońtústik Qazaqstan oblysynda 700 myńǵa jýyq otbasy bar. Jyl saıyn shańyraq kóteretin 20 myńǵa jýyq jas otbasyna jarasymdy januıa qundylyǵyn keńinen nasıhattaý mańyzdy.
Osy oraıda Elbasy bastamasymen jyl saıyn ótkizilip kele jatqan «Mereıli otbasy» ulttyq baıqaýynyń atqarar róli úlken. Bir shańyraq astynda berekeli ómir súrýdiń mańyzdylyǵyn arttyrý, otbasylyq ómir salty, ata-analyq paryz, jaýapkershilik sekildi uǵymdardy el sanasyna sińirý maqsatyndaǵy «Mereıli otbasy-2018» ulttyq baıqaýy oblystyq kezeńiniń jeńimpazdary anyqtaldy. Shámshi Qaldaıaqov atyndaǵy oblystyq fılarmonııada oblys ákiminiń orynbasary Erbol Sadyr jeńimpazdardy saltanatty túrde marapattap, oblys ákiminiń dıplomy men qarjylaı syılyǵyn tabys etti.
Baıqaýdyń oblystyq kezeńine aýdan, qaladan 38 otbasy usynylǵan. Komıssııa otyrysynda olardyń 30-y iriktelip, jeńimpazdary anyqtaldy. Segiz otbasynyń qujattary sáıkes kelmegeni sebepti, baıqaýǵa qatystyrylmapty. Osy úzdikterdiń arasynan bas júldege laıyqty dep tanylǵan Qazyǵurt aýdanynan kelgen Muhtar Momynov pen maqtaraldyq Saparaly Serikbaev januıalary mereıli otbasy atanyp, 1 000 000 teńgeden qarjylaı syılyqqa ıe boldy. Iаǵnı qyrkúıek aıynda Astana qalasynda ótetin respýblıkalyq baıqaýǵa ońtústikqazaqstandyq eki otbasy joldama aldy. Sondaı-aq, ulttyq baıqaýdyń oblystyq qorytyndy kezeńine qatysqan barlyq 28 otbasyǵa oblys ákimi J.Túımebaevtyń Alǵys haty men 200 000 teńge qarjylaı syılyq tabys etildi.
Erkin DOSYMBAI,
Ońtústik Qazaqstan oblysy