Oslo qalasynda (Norvegııa) EQYU-nyń Az ulttar isteri jónindegi Joǵarǵy komıssar ofısiniń uıymdastyrýymen «Til saıasaty jáne janjaldardy boldyrmaý: Az ulttardyń tildik quqyqtaryna qatysty Oslo usynystaryn qaıta qaraý» taqyrybynda halyqaralyq konferensııa ótti.
Forým jumysy barysynda Qazaqstan tarapynan Prezıdent Ákimshiliginiń Qazaqstan halqy Assambleıasy hatshylyǵynyń halyqaralyq yntymaqtastyq boıynsha ınspektory Ǵalymjan Mahan qatysty.
EQYU-nyń Az ulttar isteri jónindegi Joǵarǵy komıssary Lamberto Zaner, Norvegııa Syrtqy ister mınıstrliginiń Memlekettik hatshysy Aıdýn Halvorsen, BUU-nyń Az ulttar isteri jónindegi arnaıy baıandamashysy, professor Fernard de Varene forým qatysýshylaryna kirispe sóz sóıledi.
Belgili saıasatker, Norvegııanyń burynǵy Syrtqy ister mınıstri jáne EQYU-nyń Az ulttar jónindegi Joǵarǵy komıssary Knýt Vollebek Oslo usynystaryn iske asyrý jónindegi negizgi baıandamasynda «EQYU aımaǵynda az ulttardyń sany turaqty túrde ósip keledi» dep atap ótti.
Forým barysynda Ǵ.Mahan qatysýshylarǵa Qazaqstan halqy Assambleıasynyń qazirgi jumysyn aıta otyryp, elimizdegi qoǵamdyq kelisim men ulttyq birlik modeli, halyqaralyq yntymaqtastyqty, onyń ishinde uzaq tarıhy bar EQYU-nyń AUJK ofısi jóninde aıtty.
Sóz sóıleý barysynda 2017-2018 oqý jyldarynda respýblıka boıynsha ózbek, uıǵyr, tájik tilderinde bilim beretin 27 mektepte 16 442 oqýshy oqıtyny, jáne 140 aralas mektepte 100 myń oqýshy Qazaqstanda meken etetin etnostar tilderinde bilim alatyny jóninde aıtyldy.
Forým aıasynda K.Vollebek bizdiń elimizge kelgen turaqty saparlaryn úlken rızashylyqpen eske aldy. Norvegııalyq saıasatker «Uıym tarıhynda Qazaqstan EQYU-da eń tabysty tóraǵalyq etkenderdiń biri boldy» dep atap ótti.
О́z kezeginde EQYU-nyń Joǵarǵy komıssary kelesi jyly bizdiń elge kelýdi josparlap otyrǵanyn aıtty.
«Egemen-aqparat»