Búgingi tańda adamzattyń oılaý júıesi ózge arnada qalyptasyp, oǵan ǵylym álemindegi ózgerister yqpal etýde. Ásirese jas urpaq úshin aqparattyq tehnologııalardy ıgerý, óndiristik-tehnologııalyq ortaǵa beıimdelý mańyzdy bolyp otyr.
Sondyqtan da Elbasy Qazaqstan halqyna arnaǵan bıylǵy Joldaýynda elimizdiń barlyq óńirlerindegi oqýshylar saraılarynyń bazasynda kompıýterlerdi, laboratorııalardy jáne 3D-prınterlerdi qosa alǵanda, barlyq qajetti ınfraqurylymdary bar balalar tehnoparkteri men bıznes-ınkýbatorlarynyń jelisin qurýdy tapsyrǵan bolatyn. Endi Elbasy tapsyrǵan mindetti júzege asyrý maqsatynda óńirlerde tıisti josparlar men jobalar qabyldanyp, onyń alǵysharty túzilý ústinde.
Aldaǵy oqý jylynda áýlıeatalyq jurtshylyqty jaǵymdy jańalyq kútip tur. Jambyl oblystyq bilim basqarmasynyń Mektep olımpıadalaryn jáne mektepten tys is-sharalardy ótkizetin oblystyq ortalyǵynda IT-synyby ashylady. Atalǵan synypty jabdyqtaýǵa Qazaqstan Respýblıkasynyń Tuńǵysh Prezıdenti – Elbasy qory qoldaý kórsetip otyr. Osy oraıda, Jambyl oblysynda Qazaqstan Respýblıkasynyń Tuńǵysh Prezıdenti – Elbasy qory kúnderi ótti. Bul rette qor ókilderi oblys ákiminiń orynbasary Erqanat Manjýov, M.H.Dýlatı atyndaǵy Taraz memlekettik ýnıversıtetiniń rektory Mahmetǵalı Sarybekov jáne jastarmen tikeleı jumys júrgizetin basqarma basshylarymen kezdesti. Kezdesý barysynda Tuńǵysh Prezıdent – Elbasy qorynyń atqarýshy dırektorynyń orynbasary Sultan Aıtjanov Mektep olımpıadalaryn jáne mektepten tys is-sharalardy ótkizetin oblystyq ortalyqtyń dırektory Shárııa Qashqynovaǵa 3 mıllıon teńgeniń sertıfıkatyn tapsyrdy.
Jambyl óńirinde ashylýy josparlanyp otyrǵan IT-synybyna Tuńǵysh Prezıdent – Elbasy qory qoldaý kórsetip otyr. Munda bir jylda 200 jetkinshekti oqytý kózdelip, jumys sabaqtan tys qosymsha bilim berý negizinde júrgizilmek. Ortalyq dırektorynyń aıtýynsha, barlyǵy 20 top ashylyp, ár topqa 10 oqýshydan bólinetin bolady.
Sonymen qatar Tuńǵysh Prezıdent – Elbasy qorynyń ókilderi M.H.Dýlatı atyndaǵy Taraz memlekettik ýnıversıtetiniń bazasynda stýdenttermen kezdesip, jastar saıasatyn damytý máselesi men mádenıet, ǵylym jáne áleýmettik salalardaǵy birlesken jobalar jaıyn talqylady. О́z sózinde Elbasy qorynyń atqarýshy dırektorynyń orynbasary Sultan Aıtjanov jastardy qoldaýǵa, qazaqstandyq kreatıvti jáne básekege qabiletti ǵylymı qaýymdastyqty qalyptastyrýǵa baǵyttalǵan kóptegen jobalar bar ekenin, oǵan kez kelgen stýdenttiń qatysa alatynyn aıtyp ótti.
– Bul jobalar Elbasy Joldaýynda qoıylǵan mindetterge sáıkes ázirlenip, iske asyrylýda. Joǵary tehnologııalar kún sanap jańaryp otyrǵan kezeńde damyǵan elder bir-birinen qara úzip qalmaý úshin jańa ıdeıalardy júzege asyrýǵa talpynyp jatyr. Sondyqtan qor jastar jobalaryn álemdik deńgeıge shyǵarýdy kózdeıdi. Qazirgi tańda ekonomıkany damytýǵa basymdyq berilgen kóptegen startap jobalar qolǵa alynýda. Qordyń jumysy arqyly elimizdegi myńǵa jýyq jas ǵalymdardyń úzdik jobalary irikteldi. Endi jaz aılarynda Sıngapýrda ótetin álemdik baıqaýda ozyq jobalardyń kóshin bastasaq degen oıymyz bar, – deıdi ol.
Búginde elimizdiń árbir óńirindegi jastarmen berik baılanysta jumys atqaryp kele jatqan qor ótken jyldan beri jumys baǵytyn birshama ózgertip, «Sıfrly Qazaqstan» baǵdarlamasyna sáıkes Smart Zholy jáne Method PRO jobalaryn ázirlegen edi. Nátıjesinde kompıýter baǵdarlamalaryn jasaýmen aınalysyp júrgen daryndy jastar men olardyń ónimderin tutynatyn elimizdiń jáne sheteldiń iri kompanııalarymen ózara baılanys ornatýǵa múmkindik týyp otyr.
Kezdesý barysynda bıyl onynshy ret ótkizilip otyrǵan «Bolashaq ǵalymdar» atty stýdentterdiń úzdik ǵylymı jumystary anyqtaldy. Atalǵan básekede top jarǵan Taraz qalasynyń ekologııalyq problemalaryn sheshý joldaryn zerttegen Islam Dıamýrshaev, Nıkıta Samoılenko, Baǵjan Tuman men emdik qasıetteri bar trıkotaj qurylymyna zertteý jasaǵan Janerke Maırova, Qymbat Anııarbekova sııaqty TarMÝ stýdentteri marapattaldy. Aıta keteıik, osy ýaqytqa deıin TarMÝ-dyń 30-ǵa jýyq stýdenti Elbasy qorynyń ár jyldardaǵy stıpendıanty atanǵan eken.
Jambyl óńirinde ótken Qazaqstan Respýblıkasynyń Tuńǵysh Prezıdenti – Elbasy qory kúnderiniń aıasynda smartfondar men planshetterge arnalǵan latyn qarpi bar «Qazaq Latyn Keyboard» klavıatýra jobasynyń tusaýy kesildi. Sonymen qatar Elbasy qorynyń qoldaýymen ázirlengen qazaq tilin oqytatyn «Soyle.kz» onlaın-kýrsy men birqatar mobıldi qosymshalar týraly maǵlumat berilip, jastarǵa sheberlik sabaqtary uıymdastyryldy.
Hamıt ESAMAN, «Egemen Qazaqstan»
Jambyl oblysy