Ataqty Atatúriktiń kómekshisi bolǵan Jemal Grandanyń estelik kitabyn oqyp otyryp, Túrkııanyń tuńǵysh prezıdentiniń ádebıetke qanshalyqty mán berip, qalamgerlerge qamqorlyq jasaǵanyn, ult ádebıetiniń damýyna qanshalyqty qoldaý kórsetkenin paıymdaısyń.
«...Bir kúni Atatúrik qalyńdyǵy kereqarys tarıhı shyǵarmany bas almaı oqyp otyrdy. Eldegi kóptegen kókeıkesti máseleler sheshimin tappaı jatqanda, memleket basshysynyń kitap oqyp otyrǵany bárimizge oǵash kórinetini ras. Sol kezde Atatúriktiń depýtat dosy Húseıin Vasych Chynar:
– Pasham! Tarıhty oqyp, bas qatyryp ne qylasyń? Sonaý 1919 jyldyń 19 mamyrynda Samsýnda eldi ult-azattyq soǵysqa bastaǵanyńda, kitap oqyp shyǵyp pa ediń? – dep áńgimege tartady.
Atatúrik dosynyń ázil aralas sózin birden uǵady. Sóıtip kitaptyń betin jaýyp:
– Bala kezimde kóp qıyndyq kórdim, Vasych dosym. Eki qurysh (tıyn) qolyma tıe qalsa bir quryshty mindetti túrde kitapqa jumsaıtynmyn. Kitap oqymaǵanymda, osy ýaqytqa deıin eshteńe qolymnan kelmes edi ǵoı. О́mirimdegi barlyq jetistikterim osy kitaptyń arqasynda, – dep jaýap qatady.
Iá, Atatúrik ulttyq ádebıettiń iri ókilderin únemi maqtanysh tutyp otyratyn. «El irgesi – mádenıet pen ádebıet. Sondyqtan da óner adamy qol súımeıdi, onyń qolyn basqalar súıýi kerek» dep, qalam ustaǵan qadirli qaýymǵa barynsha qoldaý bildirýshi edi. Reshat Nurı Gúntekın, Namyk Kemal, Mehmet Emın Iýrdakýl, Táýfık Fıkret syndy aqyn-jazýshylardyń shyǵarmalaryn oqyp, el-jurtpen kezdesken saıyn olardy oqýǵa keńes beretin...
J.Grandanyń estelikteri maıdanda júrip shyǵarma jazǵan jaýynger qazaq qalamgerlerin, tildiń mereıi ústem bolsyn dep, ulttyq ádebıetimizge qamqorshy bolǵan tarıhı tulǵalarymyzdy eriksiz eske salady.
Atatúrik óz elin saqtap qaldy. Oǵan keńesshi bolǵan eń aldymen kitap edi.
Málik OTARBAEV