8-maýsym kúni Qazaq memlekettik qyzdar pedagogıkalyq ýnıversıtetinde «Dara» psıhologııalyq-pedagogıkalyq túzetý ortalyǵy ashylady, dep habarlaıdy oqý ornynyń Baspasóz ortalyǵy.
Ortalyqtyń ashylý rásimine QR Memlekettik hatshysy Gúlshara Ábdiqalyqova, joǵary oqý oryndarynyń basshylary men úkimettik emes uıym ókilderi qatysady.
Joba Qazaq memlekettik qyzdar pedagogıkalyq ýnıversıteti men «Dara» jeke Qaıyrymdylyq Qory jáne Almaty qalasy bilim berý basqarmasy arasyndaǵy ózara kelisimshart negizinde júzege asyrylyp otyr.
Maqsat – ınklıýzıvti bilim berý ustanymdaryn iske asyrý, Qazaqstandaǵy arnaıy bilim berýdi qoldaý, múmkindigi shekteýli balalardy bilim berý resýrstarymen qamtamasyz etý jáne bolashaq pedagog mamandarǵa praktıkaǵa baǵdarlanǵan bilim berýdi damytý.
Ortalyqta jarymjan jáne múgedek sábıler men jetkinshekter emdelip, emdik-saýyqtyrý sharalary júrgiziledi. Bul qyzmetterdiń barlyǵy da tegin kórsetiledi. Balalarǵa tıflopedagog, logoped, defektolog, psıholog, dene shynyqtyrý mamandary tegin qyzmet jasaıdy. Ortalyqta pedagogtarmen qatar stýdentter de jasóspirimderdiń turmystyq-áleýmettik daǵdylaryn qalyptastyrýǵa kómektesip qana qoımaı, olardy balabaqsha men mektepke daıyndaıdy.
– Qyzdar Ýnıversıtetiniń bazasynda ashylǵan «Dara» pedagogıkalyq-psıhologııalyq túzetý kabıneti múmkindigi shekteýli balalardyń boıynda adamı qasıetterdi qalyptastyryp, olardyń ómirge degen qushtarlyq sezimderin oıatý, oı-óristeri men oılaý qabiletterin jetildirip, tolyqqandy azamat dárejesine jetkizý maqsatynda jumys jasamaq. Áleýmettik ádildik, teńdik, ózara syılastyq pen qamqorlyq týraly nıetti tek qana memleket emes, azamattyq ortanyń óziniń kóterýi – qoǵamymyzdyń kemeldengenin, jańǵyrǵanyn kórsetedi, – deıdi oqý ornynyń Baspasóz jáne qoǵammen baılanys bóliminiń basshysy Jandar Asan.