Bıyl mamyr aıynyń bas kezinde, Jeńis merekesi qarsańynda arý qala Almatyǵa jol tústi. Keshkilik spektakl kóreıik dep M.Áýezov atyndaǵy Qazaq memlekettik akademııalyq drama teatryna bardyq. Dál sol kúni kórermenderge jas dramatýrg A.Alamannyń «Júregimniń ıesi» atty psıhofızıkalyq dramasy usynylyp jatyr eken.
Obaly ne kerek, ákemteatrdyń kishi zalyna jınalǵandardyń qarasy edáýir boldy. Kópshiligi jastar, syrttan kelgen qala qonaqtary da kózge shalyndy.
Qansha degenmen asyqpaı júrgendi táýir kóretin qazaq emespiz be, kórermender zalǵa birinen soń biri úzdik-sozdyq kelip jatty. Ornymyz aldyńǵy qatarda bolǵandyqtan, keshigip kelgenderdiń ortaǵa taman ótýi úshin áldeneshe márte turýymyzǵa týra keldi. Tipti keıbireýleri ózderiniń bizdi mazalaǵany úshin yńǵaısyzdanyp, ǵapý ótinýdiń ornyna, eshteńe bolmaǵandaı qalyp tanytyp, kúlip, bir-birimen daýystap sóılesip jatty. Olardy qaıdam, mynalary bizge birtúrli ersi kórindi. Qansha oqtalsaq ta, teatr atty kıeli orynǵa kelgen soń ádep saqtap, álgilerge renishimizdi bildirmeı ishimizden tyndyq.
Kópshilik orynǵa keletinin bilgennen keıin adam degen erterek qam jasap, belgilengen orynǵa aldyn ala jaıǵasyp almas pa. Al munyń túk te qıyndyǵy joq qoı. Soǵan qarap, «Bizde áli de bolsa keıbir kórermenderdiń mádenıeti tómen eken-aý» degen oıǵa qaldyq.
Bálkim, muny oqyǵan keıbireýler oılanar degen úmittemiz.
Káribaı ÁMZEULY,
zeınetker
Ońtústik Qazaqstan oblysy,
Sozaq aýdany